“Palmali” şirkətlər qrupunun sahibi Mübariz Mənsimov Türkiyənin keçmiş daxili işlər naziri Mehmet Ağar həbsdə olarkən ona tez-tez baş çəkə bilmək üçün həbsxananın yaxınlığında xüsusi helikopter meydançası tikdiribmiş.
Bu barədə Mənsimov “Halk TV” kanalına müsahibəsində danışıb.
Qeyd edək ki, Mehmet Ağarla Mübariz Mənsimov bir neçə il əvvələ qədər yaxın dost olublar. Lakin daha sonra onların münasibətləri korlanıb və düşmənçilik səviyyəsinə çatıb. Mehmet Ağarın Mənsimovun biznesini ələ keçirdiyi iddia edilir. Bundan başqa, M.Ağar Mənsimovun dəfələrlə ABŞ-ın Pensilvaniya ştatına, FETÖ lideri Fətullah Gülənlə görüşə getdiyini deyib: “Fətullah Gülənin yanına bir dəfə yox, dəfələrlə gedib. Ən azı 10 dəfə getdiyini mən bilirəm. Mənim təyyarəm yoxdur, Fətullah Gülənlə bağlantım yoxdur. Onun Fətullah Gülənə yaxınlığı bilinirdi. Onunla birlikdə bir dəfə Pensilvaniyaya getmişik, Mənsimovun Gülənə yaxınlığını hər kəs bilirdi”.
Bu məsələyə toxunan M.Mənsimov FETÖ ilə əlaqələri və onun barəsində çıxarılmış məhkəmə hökmü barədə bildirib ki, həmin məhkəmə hökmündən yuxarı instansiyaya şikayət verib, hazırda baxılma mərhələsindədir: “Məni örgütə yardım etməkdə günahlandırırlar. Yardım? Nə yardımı? Ortada yardım-filan yoxdur. Heç bir dərnəyə yardım etməmişəm. Sadəcə “Güllüoğlu” şirniyyat mağazasından mənim otelim 2 kiloqram paxlava alıb, 2014-cü ildə. Siz “Güllüoğlu”ndan heç paxlava almadınızmı? Bu məmləkətdə bir çıxıb desin ki, “Güllüoğlu”ndan şirniyyat yeməmişəm”.
M.Mənsimov Bodrumdakı yaxta limanının əlindən zorla alındığını inkar edərək bildirib ki, o, işçiləri tərəfindən aldadılıb: “Biz qorxaq deyilik ki, təhdid edib malımızı əlimizdən alsınlar. Haqqımdakı FETÖ ittihamına baxsanız görərsiniz ki, həmin işçilər əleyhimə ifadə veriblər. Hamısı yalançı şahiddir”.
M.Mənsimov Mehmet Ağarı 2000-ci ilin əvvəllərindən tanıdığını, onunla Bakıda tanış olduğunu deyib. O, iş adamı Yusuf Uğur və MHP millət vəkili Saffet Sancaklı M.Ağarı onunla tanış etdiyini bildirib:
“Səninlə tanış olmaq istəyir” dedilər, tanışlığımız belə oldu. Ağarı hər zaman millətçi hesab etmişəm, dövlət adamı bilmişəm. Sıxıntılı günlər keçirirdi. Sahib çıxdım, yalnız qalmasın deyə. Ağara yaşamaq üçün öz evimi vermişəm, 7-8 il ərzində bir qəpik də kirayə haqqı almamışam. M.Ağarın oğlu Tolqa Ağarı Bodrumdakı yaxta limanıma direktor qoymuşam. Limandakı benzindoldurma məntəqəsini ona vermişəm. Ağar həbsdə olarkən (M.Ağar 2011-ci ildə mütəşəkkil cinayətkar qruplaşma yaratmaq ittihamı ilə 5 il müddətinə həbs edilmişdi) hər həftə yanına gedib-gəldim. Aydında, həbsxananın yaxınlığında helikopter meydançası tikdirdim. Həftədə bir dəfə Bodrum limanından helikopter servisi sifariş verirdik”.
M.Mənsimov daha sonra bildirib ki, Mehmet Ağar həbsdən çıxdıqdan sonra Fətullah Gülənlə görüşmək istədiyini deyib: “Niyə görüşmək istədiyini onun özündən soruşun”.
Mübariz Mənsimov əlavə edib ki, özünün şəxsi təyyarəsi ilə M.Ağarla birlikdə Nyu-Yorka uçublar, oradan helikopter kirayələyib və Pensilvaniyaya gedib: “Gülənlə görüşdük, amma onun Türkiyə lideri Ərdoğan haqda danışdıqlarına etiraz etdim və görüşü yarımçıq tərk etdim. Bir az sonra Ağar da görüşdən çıxdı”.
M.Mənsimov daha sonra bildirib ki, əlindən alınmış biznesi uğrunda hüquqi müstəvidə mübarizəni davam etdirəcək. O, barəsində irəli sürülmüş FETÖ ittihamının əsassız olduğunun gec-tez sübut olunacağına əmin olduğunu deyib.