Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) keçmiş icraçı direktoru Vüqar Səfərli növbəti dəfə hakim qarşısına çıxarılır.
Məhkəmə iclasına Bakı Ağır Cinayətlər Məhkəməsinin hakimi Azər Paşayev sədrlik edəcək.
Vüqar Səfərli ilə birlikdə Bünyamin İsmayılov, Ədalət Vəliyev, Nadir Məmmədov, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyev də hakim önünə çıxarılır.
Təqsirləndirilən şəxslərdən yalnız Nadir Məmmədov və Vüqar Səfərli barəsində həbs qətimkan tədbiri seçilib. Digər təqsirləndirilən şəxslərdən V.Səfərlinin yanında baş mühasib kimi çalışmış Təhminə Yaqubova, “Altun” restoranının direktoru müavini Təmkin Xəlilov, restoranın inzibatçısı Şahin İbrahimov, “Xəmsə” restoranının icarədarları Valeh Orucov və Bəxtiyar Fətullayev barəsində ev dustaqlığı qətimkan tədbiri seçilib.
Məlumata görə, restoran icarədarları KİVDF rəhbərliyi ilə əlbir olaraq tədbirləri qeyd edilən məkanlarda keçirməklə büdcədən ayrılan vəsaitləri ələ keçiriblər.
Məhkəmədə zərərçəkmiş tərəf olan Medianın İnkişaf Agentliyini nümayəndəsi Abbas Quliyev təmsil edir.
İttiham agörə Vüqar Səfərli Bünyamin İsmayılov, Ədalət Vəliyev, Nadir Məmmədov və digər 7 nəfər şəxslə qabaqcadan əlbir olub vəzifə səlahiyyətlərindən sui-istifadə edərək dövlət satınalmalarına dair qanunvericiliyin tələblərini pozmaqda, dövlət vəsaitlərini təyinatı üzrə istifadə etməməkdə, tikinti normalarına əməl olunmamaqla iş həcmləri və qiymətlərinin şişirdilməsi yolu ilə dövlətə məxsus ümumilikdə 18 milyon 500 min manat məbləğində pul vəsaitinin mənimsəmə və israf etmə yolu ilə talanmasında, rəsmi sənədlərə bilə-bilə yalan məlumatlar daxil etməklə vəzifə saxtakarlığı törədilməsində, cinayət yolu ilə əldə edilmiş 5 milyon 700 min manat pul vəsaitinin leqallaşdırmasında təqsirli bilinir.
Təqsirləndirilən şəxslərə məxsus olan daşınar və daşınmaz əmlak və bank əmanətlərinin üzərinə həbs qoyulub.
Vüqar Səfərlinin üzərinə həbs qoyulan bank əmanətləri və əmlaklarının siyahısı:
– “Rabitəbank” ASC-də 300 min manat, həmin bankda oğluna məxsus 550 min manat əmanət;
– Xətai rayonu, Nobel prospektində yerləşən mağaza;
– Əhmədli qəsəbəsində yerləşən torpaq sahəsi;
-Xətai rayonu, Lütfü Zadə küçəsində yerləşən mənzil;
– İsmayıllı rayonu, Ticran kəndində yerləşən torpaq sahəsi və ev;
– “Mercedens Benz ML 350”, “Wolksvagen Tuareg” və “Toyota land Gruser” markalı avtomobillər.
Qeyd edilən daşınar və daşınmaz əmlakın ümumi dəyəri 637 min manatdır.
Bunlardan başqa, Vüqar Səfərlinin yoldaşının adına Binəqədidə olan torpaq sahəsi, oğlunun adına Novxanı kəndində olan torpaq sahəsi və oğlununa adına Xətai rayonunda olan obyektinin üzərinə də məhkəmə qərarı ilə həbs qoyulub.
Qeyd edək ki, təqsirləndirilən şəxslər barəsində Cinayət Məcəlləsinin 179.4 (mənimsəmə – xüsusilə külli miqdarda ziyan vurmaqla törədildikdə), 193-1.3.2 (cinayət yolu ilə əldə edilmiş pul vəsaitlərini leqallaşdırma – külli miqdarda törədildikdə), 308.2 (vəzifə səlahiyyətlərindən sui-istifadə etmə – ağır nəticələrə səbəb olduqda), 313 (vəzifə saxtakarlığı) və digər maddələri ilə ittiham elan edilmiş, Vüqar Səfərli barəsində məhkəmənin qərarı ilə həbs, digər şəxslər barəsində isə polisin nəzarəti altına vermə qətimkan tədbiri seçilib.
Xatırladaq ki, Prezident İlham Əliyevin 2020-ci il aprelin 4-də imzaladığı sərəncamla Vüqar Səfərli KİVDF-nin İcraçı direktoru vəzifəsindən azad edilib.