Norveçdə yaşayan 11 yaşlı azərbaycanlı Səlim Abbaszadə İkinci Qarabağ müharibəsinə, müharibənin nəticələrinə və Qarabağın tarixinə həsr olunmuş “Naqorno Karabakh” adlı ilk kitabını hazırlayıb.
“Azərbaycanda yaşayan qohumlarımızın çoxu II Qarabağ savaşında iştirak edib. Şəhidlərimiz var. 44 gün ərzində Azərbaycan işğal altında olan torpaqlarımızı azad etdi. Mən müharibə haqda yazılanları, video və şəkilləri izləyirdim. Norveç mətbuatında əsasən ermənilərin xeyrinə birtərəfli yazılar gedirdi. Bu kitabı ona görə hazırladım. Müəllimlərim, sinif, məktəb yoldaşlarım üçün. Məqsədim Azərbaycanı, Qarabağı Norveçdə olduğu kimi tanıtmaqdır. II Qarabağ müharibəsində qələbəmizi, işğal altında olan torpaqlarımızın necə azad olunduğunu bilsinlər, şəhidlərimizi tanısınlar istədim”-deyir Səlim.
Məktəbli oğlan qısa müddətdə kitab üçün mətnlər yazıb, müharibə anlarının unudulmaz forolarını toplayıb, özü illüstrasiyalar çəkib, nəşriyyatla danışıb, nəhayət ilk kitabını qənaət etdiyi pulla çap etdirib.
Səlim hazırda Norveçin Mərkəzi Telemark bələdiyyəsinin şəhər uşaq məktəbinin 6-cı sinfində oxuyur. Bələdiyyənin Kültür məktəbinin 2-ci sinfində rəssamlıq təhsili alır. Osloda Nizami Gəncəvi adına həftəsonu Azərbaycan dili məktəbində oxuyur.
Səlim Abbaszadə jurnalist İdrak Abbasovun öğludur. Azərbaycanda təzyiqlərə məruz qalan ailə 2014-cü ildə Norveçə köçüb. Ailənin üç övladı bu ölkədə təhsilini davam etdir. Evin ən kiçiyi Simurq isə Norveçdə dünyaya gəlib.