“AZAL” və “Buta Airways” pandemiya səbəbindən ləğv edilmiş uçuşlara biletlərin qaytarılması, dəyişdirilməsi üçün ötən il müəyyənləşdirdiyi qaydalara əlavələr edib. Şirkət bununla bağlı məlumat yayıb. Məlumatda sərnişinlərə əvvəlki hərəkət marşrutunu saxlayıb uçuş tarixini yeniləməklə ödəniş etmədən biletləri dəyişdirmək təklif olunur. Vətəndaşlar tariflər arasındakı fərqi ödəməklə biletləri hazırki uçuş marşurutlarına dəyişə bilərlər.
“Buta Airways” aviaşirkətinin ləğv edilən reyslərinə biletləri tarif fərqini ödəməklə AZAL-ın reyslərinə dəyişdirmək mümkündür.“Buta Airways” aviaşirkətinin biletlərini əlavə ödəniş etmədən, aşağıbüdcəli aviaşirkətin hazırkı xüsusi reyslərinə (istənilən istiqamət) təxsis edə bilərlər.
Sərnişinlərə yalnız bir dəfə aviabileti ödənişsiz dəyişmək şansı verilir. Aviabiletin dəyərinin qaytarılmasına alternativ olaraq aviabiletin əldə edildiyi ilk tarixdən iki il ərzində istifadəsi mümkün olan vauçer təklif olunur.
Qeyd edək ki, pandemiyaya görə ötən il ölkələrarası uçuşlar ləğv edildiyindən mart ayında “AZAL” və “Buta Airways” baş tutmayan reyslərin sərnişinlərinə biletlərinin dəyərini qaytardı. Sonrakı aylarda biletlərin geri qaytarılmasından imtina edildi. Şikayətçilərə aviaşirkət normal fəaliyyətini bərpa adəndən 60 gün sonra, alınan aviabiletlərin tam dəyərinin geri qaytarılacağı bildirildi. İki il ərzində keçərli vauçerlər təklif olundu. Hazırda aviaşirkət tam gücülə çalışmasa da, daha baha qiymətə bilet satmaqla xüsusi reyslər həyata keçirir. Bu zaman “Covid-19” üçün test cavabı istənilir. Sosial şəbəkələrdə xüsusi reyslərin bilet qiymətlərinin baha olması barədə tənqidi fikirlər var.
Azərbaycan Hava Yolları (AZAL) 7 aprel 1992-ci il tarixdə təsis edilib. AZAL-ın marşurut şəbəkəsi 25 ölkədən, 40 istiqamətdən ibarətdir.
Xatırladaq ki, koronavirus pandemiyası səbəbindən bütün uçuşların dayandırılması ilə əlaqədar dövlət dəstəyi tədbirləri çərçivəsində 2020-ci ilin may ayında Azərbaycan Hava Yolları QSC-yə (AZAL) 86 mln. 900 min manat vəsait köçürülüb.