Fevralın əvvəlindən Ermənistanda vətəndaşların orduya qış hərbi çağırışı başlayıb. Amma “Sputnik Ermənistan”a məlum olub ki, Ermənistandan olan çağırışçılar ancaq respublika daxilində yerləşən hərbi hissələrdə xidmət edəcəklər. Ənənəvi püşkatma zamanı Qarabağın hərbi hissələri variantlar arasında göstərilməyib.
Doxsanıncı illərin əvvəllərindən ilk dəfə Ermənistandan olan möhlətli hərbçiləri Qarabağa göndərmirlər. Ermənistanın baş naziri Nikol Paşinyan oğullarını Azərbaycan ərazisinə göndərməməyi tələb edən çağırışçıların valideynlərinin təzyiqi altında ermənilər üçün bu acı qərarı qəbul etməyə məcburdur.
Bundan öncə mətbuatda və sosial şəbəkələrdə Dağlıq Qarabağın “müdafiə ordusu”nun buraxılması haqda xəbərlər yayılıb. Qarabağ “Təhlükəsizlik Şurası”nın katibi Vitali Balasanyan daha sonra bildirib ki, hakimiyyət müqavilə əsasında peşəkar hərbi bölmələrin yaradılması ilə məşğuldur. Lakin o, həmin dəstələrdə hansı ölkələrin vətəndaşlarının toplaşacağını dəqiqləşdirməyib. Sonra “Qarabağ prezidenti” Arayan Arutyunyan bəyanatla çıxış edərək müdafiə ordusunun buraxılmasına dair şayiələri təkzib edib.
Ola bilsin ki, Qarabağda müqavilə ilə xidmət keçənlər yenə də Ermənistan vətəndaşları olacaq. Lakin erməni mənbələrindən verilən növbəti məlumatda Ermənistan vətəndaşları üçün Qarabağa getməklə bağlı çətinliklərin olduğu bildirilir.
Regionda yerləşdirilmiş RF sülhməramlı qüvvələri ilə əldə edilmiş razılaşmalara uyğun olaraq noyabrın sonlarından erməni zəvvarlar bazar günləri rusiyalı sülhməramlıların müşayiətilə monastr kompleksinə baş çəkiblər, artsakhtert.com yazır.
Fevralın 7-də səhər saat 8:00-da bir qrup erməni zəvvar və ruhani ilkin razılığa əsasən rusiyalı sülhməramlıların müşayiətilə Xankəndidən (Stepanakert) Kəlbəcər rayonunda yerləşən Xudavəng (erməniləşdirilmiş adı Dadivank) Alban monastr kompleksinə yola düşüb.
Vətən Müharibəsində qələbənin nəticəsində Azərbaycan bu rayonu erməni işğalından azad edib.
Ermənistan vətəndaşlarının Qarabağa səfəri ilk dəfə baş tutmayıb, belə ki, monastrın qapısının önündə növbə çəkən azərbaycanlı hərbçilər avtomobilləri dayandırıb və bildiriblər ki, səfər onlarla razılaşdırılmayıb.
Ancaq Ermənistan KİV yazır ki, rusiyalı sülhməramlılar öncədən Azərbaycan tərəfini xəbərdar edib.
Azərbaycan Silahlı Qüvvələrinin nümayəndələri vəziyyəti aydınlaşdırmaq üçün zəvvarları qonşu kənddə üç saat gözləməyə məcbur ediblər, ancaq yenə də onları Xudavənğə buraxmayıblar.
Sülhməramlıların və zəvvarlar qrupunun məsul nümayəndələrinin hər şeyin razılaşdırıldığını və hamının hər şeydən xəbərdar olduğunu izah etmək cəhdləri nəticə verməyib. Rusiya sülhməramlılarının müşayiətilə bir qrup zəvvar ikinci dəfə Dadivanka gedib. Burada uzun müddət gözlədikdən sonra azərbaycanlılar təkcə zəvvarları deyil, həm də keşişləri əvəz etməyə gələnləri monastrın ərazisinə buraxmayıblar.
Erməni zəvvarlar gətirdikləri ikonalarla birlikdə Xankəndiyə qayıtmaq məcburiyyətində qalıblar, BlogNews.am bildirir.
Müharibə nəticəsində Ermənistandan Kəlbəcərə yalnız Xankəndidən keçən avtomobil yolu ilə getmək olar. Ermənistandan monastra gedən birbaşa yol xaricilər üçün bağlanıb, orada Azərbaycan ordusu yerləşir.
Xarakterik haldır ki, hər iki məlumatda qanunsuz “DQR” və “respublika” adları Azərbaycan ərazisi ilə əlaqəli olaraq işlədilməyib.
Bu həftə Qarabağda mövcud olmayan dövlətçilik atributlarının tədricən məhdudlaşdırıldığından xəbər verən başqa əlamətdar hadisə baş verib. Ermənistan KİV-də Xankəndidə “Xarici İşlər Nazirliyi”nin ləğvi barədə məlumat yayılıb. Fevralın 8-də isə mövcud olmayan “nazirlik” qəribə bəyanatla çıxış edib. Bəyanata görə, xarici vətəndaşların Qarabağa səfəri Ermənistan XİN-in müvafiq icazəsindən sonra mümkündür.
Əslində, məlum olur ki, separatçılar Fransa və Çexiyadan Xankəndiyə gələn qonaqlarla baş verənlərin digər əcnəbilərlə də təkrarlanmasından narahatdır. Belə ki, onlar Yerevandan Xankəndiyə getmək istəyiblər, ancaq Gorus-Xankəndi yolunda Rusiya postu tərəfindən geri qaytarılıblar.
Əcnəbilərə deyiblər ki, Qarabağa yalnız 9 noyabr 2020-ci il tarixli sülh bəyanatını imzalayan ölkələrin vətəndaşları gedə bilər.
Erməni kilsəsinin rəhbərliyində ümid edirlər ki, qadağa aradan qaldırılacaq. Dini idarənin (Eçmiədzin) mətbuat- dəftərxananın direktoru Vaqram Məlikyan sosial şəbəkədə yazıb: “Ümid edək ki, hər şey yoluna düşəcək və əldə olunmuş razılaşmalara hörmətlə yanaşılacaq”. Qarabağda ruhanilər yardım üçün “müvafiq instansiyalar”a müraciət etmək niyyətindədirlər.