Tanınmış hüquqşünas Ələsgər Əhmədoğlu özünün Facebook səhifəsində “Xəzər TV” MMC-nin təsis paylarının “SOCAR Media” İctimai Birliyi tərəfindən satın alınmasına münasibət bildirib.
Ə.Əhmədoğlu qeyd edib:
“5 mart 2020 tarixində yayılan məlumatlardən bəlli olur ki, “Xəzər TV” MMC-nin təsis paylarının “SOCAR Media” İctimai Birliyi tərəfindən satın alınması baş verib və yeni təsisçi dərhal yeni rəhbəri Xəzər TV-yə təyin edib. Bu məsələ bir neçə aspektdən mübahisəlidir”.
“Televiziya və radio yayımı haqqında” qanunda iki önəmli müddəa var. Birincisi, Qanunun 10.1 maddəsində özəl yayaımçının təsisçilərini iki hissədə göstərib.
a) Azərbaycan Respublikasının ərazisində daimi yaşayan Azərbaycan Respublikasının vətəndaşları;
b) nizamnamə kapitalı Azərbaycan Respublikasında daimi yaşayan Azərbaycan Respublikasının vətəndaşlarına məxsus olan hüquqi şəxslər tərəfindən təsis edilə bilər.
SOCAR Media hüquqi şəxs olsa da ictimai birlikdir, MMC deyil və nizamnamə kapitalı yoxdur.
İkincisi, “Televiziya və radio yayımı haqqında” qanunun 10.5-ci maddəsinin tələbidir ki, özəl teleradio yayımçısının təsisçiliyində və pay sahibliyində hər hansı bir dəyişiklik zərurəti yaranarsa, bu barədə bir ay əvvəl müvafiq dövlət orqanına məlumat verilir. Müvafiq dövlət orqanı dəyişikliyin bu qanunun tələblərinə uyğun olmasına dair iki ay müddətində rəy verdikdən sonra bu dəyişiklik edilir və bir ay ərzində yeni sənədlər müvafiq dövlət orqanına təqdim olunur.
Yəni, bu dəyişikliiyin baş verməsi üçün 4 ay bundan öncə “Xəzər TV” Milli Televiziya və Radio Şurasına (MTRŞ) müraciət etməli idi. MTRŞ da 2 ay ərzində belə bir dəyişikliyin mümkünlüyünə dair rəy verməli idi. Sonrakı bir ay ərzində isə yeni dəyişiklik qeydə alınmalı və rəsmiləşməli idi. MTRŞ belə bir qərar verməyib və “Xəzər TV”-nin təsisçisi “Xəzər TV” MMC olaraq görünür.
Bir digər mübahisəli məsələ “Socar Media” İctimai Birliyin öz statusu ilə bağlıdır. Qanuna əsasən, ictimai birlik – təsis sənədlərində müəyyən olunmuş məqsədlərlə ümumi maraqlar əsasında birləşmiş bir neçə fiziki və (və ya) hüquqi şəxsin təşəbbüsü ilə yaradılmış könüllü, özünüidarəedən, öz fəaliyyətinin əsas məqsədi kimi gəlir əldə etməyi nəzərdə tutmayan və əldə edilən gəliri öz üzvləri arasında bölməyən qeyri-hökumət təşkilatdır. Belə olduğuna görə “SOCAR Media” “Xəzər TV”-dən gələn bütün gəlirlərini, o cümlədən reklam gəlirlərini nizamnamə məqsədinə yönəltməlidir”.
Qeyd edək ki, martın 5-də “Xəzər TV” MMC-nin təsis paylarının “SOCAR Media” İctimai Birliyi tərəfindən alınması barədə sənəd imzalanıb.Kanalın yeni rəhbəri, Xalq artisti Murad Dadaşov “SOCAR Media”nın sədri Xalik Məmmədov tərəfindən kollektivə təqdim edilib.