Rusiya ordusu Ukrayna ilə sərhəd boyunca təhlükəsizlik bufer zonasının yaradılması üzərində işləyir. Bunu prezident Vladimir Putin mayın 22-də hökumət üzvləri ilə görüşündə bildirib.
“Sərhəd boyunca lazımi təhlükəsizlik bufer zonasının yaradılması ilə bağlı qərar qəbul edilib. Hazırda silahlı qüvvələrimiz bu problemi həll edir. Düşmənin atəş nöqtələri fəal şəkildə susdurulur, iş gedir “, – o deyib.
Putin Ukraynanın hücumlarından əziyyət çəkən bölgələr arasında Belqorod, Bryansk və Kursk vilayətlərinin adını çəkib.
Bugünlərdə Putin Kursk vilayətində bələdiyyələrin rəhbərləri ilə görüşüb. Sərhədyanı Qluşkov rayonunun rəhbəri Pavel Zolotarev Putindən Sumı vilayətində bufer zonası yaratmağı xahiş edib. Putin bu bufer zonasının nə qədər dərin olmalı olduğunu soruşub. Zolotarev deyib ki, Rusiya “heç olmasa” Sumı şəhərini tutmalıdır.
Mayın ortalarında Sumı vilayətinin rəhbərliyi Rusiya ilə həmsərhəd olan 202 yaşayış məntəqəsindən 4 mindən çox insanın təxliyəsini elan edib. (Azadliq.org)