ABŞ Polşa vasitəsilə Ukraynaya silah tədarükünü və kəşfiyyat məlumatlarının ötürülməsini bərpa edib. Bu, Səudiyyə Ərəbistanının Ciddə şəhərində Kyiv və Vaşinqton nümayəndələri arasında danışıqlardan bir gün sonra baş verib.
Polşanın xarici işlər naziri Radoslav Sikorski ABŞ-ın Polşanın Yasenka mərkəzi vasitəsilə Ukraynaya silah tədarükünü bərpa etdiyini açıqlayıb.
ABŞ Milli Kəşfiyyatının direktoru Tulsi Qabbard Ukrayna ilə kəşfiyyat məlumatlarının mübadiləsi prosesinin bərpa olunduğunu bildirib. “Prezidentin göstərişi ilə Ukrayna ilə kəşfiyyat məlumatlarının mübadiləsində fasilə başa çatdı”, Qabbard yazıb.
Ukrayna Amerikanın Maxar Technologies şirkətinin peyk şəkillərinə də çıxış əldə edib. Şirkət hesabları və ABŞ hökuməti tərəfindən toplanmış kommersiya peyk görüntülərinə çıxışı bərpa edib.
ABŞ və Ukrayna rəsmiləri çərşənbə axşamı Səudiyyə Ərəbistanının Ciddə şəhərində Rusiyanın Ukraynaya qarşı apardığı müharibəyə son qoyulması səylərini müzakirə etmək üçün görüşüblər. Hər iki tərəf Kyivin ABŞ-ın təklif etdiyi 30 günlük atəşkəs rejimini dəstəklədiyini bildirib.
Danışıqlardan sonra yayımlanan birgə bəyanatda deyilir ki, “Ukrayna ABŞ-ın tərəflərin qarşılıqlı razılaşması ilə uzadılan və Rusiya Federasiyası tərəfindən qəbul və dərhal eyni vaxtda həyata keçirilməli olan 30 günlük müvəqqəti atəşkəsin qüvvəyə minməsi təklifini qəbul etməyə hazır olduğunu bildirib. Birləşmiş Ştatlar Rusiyaya çatdıracaq ki, Rusiyanın qarşılıqlı münasibəti sülhə nail olmaq üçün açardır”.
Birgə bəyanatda ABŞ-ın kəşfiyyat məlumatlarının mübadiləsinə olan fasiləni dərhal aradan qaldıracağı və Ukraynaya təhlükəsizlik yardımını bərpa edəcəyi qeyd edilir. (Amerikanın səsi)