“Azərbaycabn Hava Yolları”na (AZAL) məxsus təyyarənin şifrəsi açılmış qara qutuları Braziliyadan Qazaxıstana gətirilib.
Bu barədə Kazinform agentliyi Qazaxıstanın Nəqliyyat Nazirliyinə istinadən xəbər yayıb.
“Qazaxıstana gətirilən registratorların şifrəsi açılmış məlumatları mütəxəssislər tərəfindən tədqiq edilir”, nazirlikdən bildiriblər.
Nazirlik həmçinin qeyd edib ki, Nəqliyyat Nazirliyinin Aviasiya Qəzalarının Araşdırılması Komissiyası İCAO-nun 13 saylı Əlavəsinin standartlarına və tövsiyə edilən təcrübələrə uyğun olaraq, bütün fakt və materialları ətraflı araşdırdıqdan sonra ilkin hesabat dərc edəcək. İstintaqın gedişi ilə bağlı müəyyən edilmiş faktiki məlumat verəcək.
Ötən il dekabrın 25-də Bakı-Qroznı reysini həyata keçirən “Azərbaycan Hava Yolları” (AZAL) QSC-yə məxsus “Embraer 190” sərnişin təyyarəsi Qazaxıstanın Aktau şəhəri yaxınlığında məcburi eniş edərkən qəzaya uğrayıb. Təyyarədə 5 ekipaj üzvü daxil olmaqla 67 nəfər olub. Qəza nəticəsində 38 nəfər həlak olub, 29 nəfər sağ qalıb.
Yanvarın 2-də Braziliya Hərbi Hava Qüvvələrinin Təyyarə Qəzalarının Araşdırma Mərkəzinin (Cenipa) mütəxəssisləri qəzaya uğrayan “Embraer 190” təyyarəsinin qara qutularını tədqiq etməyə başlayıb.
Təyyarənin uçuş reqistratorlarının (qara qutularının) şifrəsinin açılması yanvarın 7-də başa çatıb.
Azərbaycan rəsmiləri AZAL-ın Bakı-Qroznı marğrutu ilə uçan təyyarəsinin Rusiya ərazisində xarici təsirə məruz qaldıqdan sonra Qazaxıstanın Aktau şəhəri yaxınlığında məcburi eniş edərkən qəzaya uğradığını bildirib.
Sağ qalan sərnişinlər də təyyarənin Rusiya səmasında vurulduğunu bildirib.
Azərbaycan Prezidneti İlham Əliyev Rusiyadan üzr istəməsini, günahkarların cəzalandırılmasını və kompensasisya verilməısini istəyib. Rusiya Prezidenti Vladimir Putin təyyarənin Rusiya səmasında vurulduğuna görə üzr istəyib. Amma digər tələblərlə bağlı Rusiya hələ açıqlama verməyib.
Yanvarın 14-də Rusiyanın xarici işlər naziri Sergey Lavrov bildirib ki, Aktau şəhəri yaxınlığında qəzaya uğrayan “Azərbaycan Hava Yolları”na (AZAL) məxsus təyyarənin qara qutularının oxunması mətbuatda verilən bəzi ilkin qənaətləri təsdiqləmir.
“Braziliyada xüsusi iclas keçirildi, biz qara qutuları açdıq, onların məzmunu artıq çoxlu maraqlı məlumatlar təqdim edib, məzmunu bizi bir daha inandırır ki, tam hüquqi bir görüş gözləmək lazımdır”, o qeyd edib.
Baş diplomat deyib ki, indi qara qutuların məlumatı ilə təsdiqlənməyən məlumatlardan istifadə edərək media məkanında atmosferi qarışdırmağa ehtiyac yoxdur.
Rusiya xarici işlər nazirinin bu bəyanatına rəsmi Bakı hələ şərh verməyib. (Amerikanın səsi)