Azərbaycan Dəmir Yolları (ADY) Bakı-Balakən-Bakı reysini bərpa edib. Yanvarın 3-dən etibarən saat 23:50-də Bakıdan Balakənə yola düşmək mümkün olacaq. Balakəndə paytaxta isə gəlmək saat 22:10-a təyin olunub. Ümumilikdə səfərlər uyğun olaraq, 8 saat 20 dəqiqə və 8 saat 40 dəqiqə sürəcək
ADY tarifləri açıqlayıb. Yataq tipli vaqonlardan ibarət qatarlarda “Standart” xidməti 22, “Standart+” 33, “Biznes” isə 88 manata təklif olunur. ADY rəhbərliyi nəqliyyat ekspertləri ilə görüşdə sürətin 80 km/saat olacağını bildirmişdi. Qapalı səhmdar cəmiyyətin sədri Rövşən Rüstəmov oktyabrda jurnalistlərlə söhbətində də sürətlə bağlı belə ifadə işlətmişdi. Sürətin çox aşağı olması hələ o vaxt müzakirəyə çevrilmişdi.
Rövşən Rüstəmov oktyabrda demişdi ki, köhnə nəsil yataq tipli vaqonlardan ibarət qatarı müasirləşdirəcəklər. Sədr belə vaqonlara məhz sərnişinlərin tələbinə görə ehtiyac duyulduğunu demişdi: “Məsafə uzaq olduğuna görə insanlar istəyirlər”.
Xəbərə ilk reaksiyaların əksərində biletlərin baha olması dilə gətirilir. Sərnişinlər uzağı 5 saata “Vita” markalı avtomobillərlə mənzil başına çatırlar. Bunun üçün cəmi 25 manat ödəyirlər. Qatarla daha gec səyahət heç də ucuz başa gəlmir. Nəzərə almaq lazımdır ki, hər iki şəhərdə dəmir yolu vağzalından ünvana çatmaq da xərc tələb edir. Məsələn, sərnişin daşıyan “Vita”larla səfərdə bu qayğıdan azad olursan. Çünki həmin avtomobillər Balakəndə sərnişinləri az qala evinin qarşısına çatdırır.
Sürət aşağıdır, buna görə də mübahisəyə ehtiyac yoxdur. Təxminən 400 km məsafə az qala 9 saata qət olunur. Belə çıxır ki, səfər zamanı stansiyalarda gözləmə müddəti böyükdür. Böyükdürsə, ən axırıncı stansiyaya yollanan sərnişinlər üçün səfər çox əziyyətli görünəcək.
Ölkənin müxtəlif istiqamətlərinə qatar reyslərinin təşkili yaxşıdır. Amma şərtlər də uyğun olmalıdır. Sərnişinlər üçün səfər həm sərfəli olmalı, həm də rahatlıq təmin edilməlidir.
Aytən, Bizimyol.info