ABŞ-ın yeni seçilmiş prezidenti Donald Tramp özünün Truth Social sosial media platformasının baş direktoru Devin Nunesi kəşfiyyat üzrə məsləhət şurasına rəhbərlik etmək üçün namizəd göstərdiyini açıqlayıb. Tramp həmçinin ilk prezidentliyi dönəmində kəşfiyyat rəhbəri olan Riçard Qrenellin Venesuela və Şimali Koreya kimi ABŞ əleyhdarı olan ölkələrdə “xüsusi missiyalar” həyata keçirəcəyini bildirib.
“Riç Venesuela və Şimali Koreya da daxil olmaqla, dünyanın ən qaynar nöqtələrində işləyəcək”, Tramp Truth Social səhifəsində verdiyi açıqlamada bildirib. “Riç güc vasitəsilə sülh uğrunda mübarizəyə davam edəcək və həmişə AMERİKANI BİRİNCİ yerə qoyacaq”, o əlavə edib.
Qrenelli “prezidentin xüsusi tapşırıqlar üzrə xüsusi nümayəndəsi” adlandırdığı yazısında Tramp İran kimi digər ölkələrin adını çəkməyib.
Qrenell əvvəllər Trampın 2017-2021-ci illərdə prezidentliyi dövründə milli kəşfiyyat direktoru vəzifəsini icra edib və Almaniyada səfir olub, həmçinin Serbiya-Kosovo sülh danışıqları üzrə prezidentin xüsusi nümayəndəsi vəzifələrində çalışıb.
Trampın Truth Social platformasını idarə edən keçmiş Konqres üzvü olan Nunes kəşfiyyat orqanlarının effektivliyi və planlaşdırılması ilə bağlı müstəqil qiymətləndirmələr verən Prezidentin Kəşfiyyat Məsləhət Şurasının sədri vəzifəsini icra edəcək.
Devin Nunes Trampın Ağ Evdə ilk səlahiyyət müddətinin bir hissəsində ABŞ Nümayəndələr Palatasının Kəşfiyyat Komitəsinə sədrlik edib. Tramp bildirib ki, onu uzun müddətdir dəstəkləyən Nunes Ağ Evin şurasında çalışdığı müddətdə Truth Social şirkətinin baş direktoru vəzifəsində qalacaq.
Nunes ABŞ Nümayəndələr Palatasının Kəşfiyyat Komitəsinin üzvü olduğu müddətdə Trampın Demokrat namizəd Hillari Klintonu məğlub etdiyi 2016-cı il prezident seçkilərinə Rusiyanın müdaxiləsini araşdıran Federal Təhqiqatlar Bürosunun Trampa qarşı qəsddə əlbir olduğunu iddia edib.
“Devin Nümayəndələr Palatasının Kəşfiyyat Komitəsinin keçmiş sədri kimi təcrübəsindən və Rusiya, Rusiya yalanının ifşa edilməsində əsas rolundan istifadə edərək, mənə ABŞ Kəşfiyyat icmasının effektivliyi və legitimliyi ilə bağlı müstəqil qiymətləndirmələr verəcək”, Tramp yazıb.
Trampın Federal Təhqiqatlar Bürosunun rəhbəri vəzifəsinə namizədi Kaş Patel ABŞ Nümayəndələr Palatasında Nunesin köməkçisi olub.
ABŞ kəşfiyyatının 2017-ci il hesabatında Rusiya prezidenti Vladimir Putinin Klintonu ləkələmək və 2016-cı il seçki kampaniyasında Trampı dəstəkləmək üçün mürəkkəb təsir kampaniyası təşkil etdiyi bildirilib.
Kreml müdaxiləni, Tramp isə Rusiya ilə hər hansı sövdələşməni rədd edib.
Tramp şənbə günü həmçinin IBM şirkətinin icraçı direktoru və Daxili Təhlükəsizlik Departamentinin keçmiş rəsmisi Troy Edqarı departamentin katibinin müavini vəzifəsinə nominasiya edib. O həmçinin iş adamları Bill Uayt və Edvard Uolşu müvafiq olaraq ABŞ-ın Belçika və İrlandiyadakı səfirləri vəzifəsinə nominasiya edəcəyini bildirib. (Amerikanın səsi)