Avqustun 6-da ombudsmanın nümayəndəsi Penitensiar Xidmətin müalicə müəssisəsində iqtisadçı Fazil Qasımova baş çəkib. Qasımov 55 gündür aclıq edir.
Vəkil Rövşanə Rəhimova Turan-a bildirib ki, Ombudsman Aparatından ona zəng edib deyiblər ki, avqustun 7-də Qasımovun bəzi problemləri həll olunub.
“Ədliyyə Nazirliyinin təlimatına əsasən, aclıq edən məhbus çay içə bilər. Ancaq indiyə qədər Qasımovun belə imkanı olmayıb və adi su içib. Fazilin saxlanıldığı otaqda çaydan yox idi. İndi otağına çaydan gətiriblər”, – vəkil deyib.
Vəkilin sözlərinə görə, Qasımov çayı balla qarışdırıb içə bilər. Qasımovun gəzintiyə çıxarılması məsələsi də həll olunub.
İki həftədən çox idi ki, çimməyə icazə vermirdilər. Bu məsələ də həllini tapıb.
Eyni zamanda vəkil deyib ki, Qasımov vəziyyətin ağırlığına baxmayaraq, aclığı sonadək davam etdirmək əzmindədir.
Ombudsman Aparatında Qasımovla konfidensial qaydada görüş keçirildiyini təsdiqləyiblər.
Qasımovun vəziyyətinin nəzarətdə saxlanması ilə bağlı müalicə müəssisəsinin rəhbərliyinə müvafiq tövsiyələr verilib.
* Fazil Qasımov 7 avqust 2023-cü ildə Türkiyədə saxlanılıb və Azərbaycana gətirilib. O, Cinayət Məcəlləsinin 204.3.1-ci (mütəşəkkil qrupun tərkibində saxta pulların hazırlanması, alınması və ya satışı) maddəsilə ittiham olunub.
İstintaq bildirir ki, o, saxta pulları sonradan həbs olunmuş müxalifətçi siyasətçi Qubad İbadoğluna verib.
Bu yaxınlarda Qasımov baş prokuror, ombudsman, yerli və beynəlxalq ictimaiyyətə müraciətində bildirib ki, bu ifadələri işgəncə altında verib. O, ifadələrdən imtina edərək İbadoğluna saxta pul vermədiyini, onunla heç vaxt FETO (Türkiyədə terror təşkilatı kimi tanınan Fətullah Gülən hərəkatı) mövzularında müzakirələr aparmadığını bildirib.
Fazil Qasımov əsassız cinayət təqibinə və istintaqın əvvəlində məruz qaldığı işgəncələrə etiraz olaraq iyunun 14-dən aclıq edir.