• 25 May 2024 08:40

Ramazan bayramı namazı aprelin 10-da qılınacaq

Apr 8, 2024

Azərbaycan məscidlərində Ramazan bayramı namazı Əjdərbəy məscidində aprelin 10-da Bakı vaxtı ilə saat 8-də, Təzəpir məscidində isə saat 9-da qılınacaq.

Qafqaz Müsəlmanları İdarəsinin (QMİ) sədri Allahşükür Paşazadənin Ramazan bayramı münasibətilə Azərbaycan və dünya müsəlmanlarına təbrikində deyilir ki, Azərbaycan Milli Elmlər Akademiyası Şamaxı Astrofizika Rəsədxanasının məlumatına görə, bu il Şəvval ayının 1-i – Ramazan bayramı Miladi təqvimlə aprelin 10-na təsadüf edir.

“Orucun mühüm əməllərindən biri olan fitrə zəkatının vaxtı Ramazan ayının son günü – Bayram axşamı şam namazından sonradır. Qazılar Şurasının Fətvasına görə, adambaşına 10-15 manat fitrə zəkatının verilməsi tövsiyə olunur. Fitrə canın sədəqəsidir və imkanı olan müsəlmanın ailəsinin hər bir üzvü üçün fitrə zəkatı çıxarması, imkansızlara, ehtiyacı olan ailələrə verməsi vacibdir. Bu, hər bir ailəyə bayram ovqatı yaşamağa imkan yaradır”, deyə o qeyd edib.