• 14 Aprel 2024 02:18

Ələsgər Məmmədlinin qaynı-həkim Aydın Əliyev işdən çıxarılıb

Mar 13, 2024

Həkim Aydın Əliyev çalışdığı “İstanbul” klinikasından işdən çıxarılıb. Bu barədə Aydın həkim sosial şəbəkədə məlumat verib.

Onun sözlərinə görə, martın 12-də klinikanın rəhbərliyi işdən azad edildiyini ona deyib: “Dedilər ki, sabahdan işə gəlmə”.

Həkim bunun səbəbini yaxın günlərdə baş verənlərlə əlaqələndirir: “Mənim bacımın həyat yoldaşı Ələsgər Məmmədli həbs olundu və mən onun qanunsuz həbsinə münasibət bildirmişəm. Görünür ki, bu kiminsə xoşuna gəlməyib”.

A.Əliyev qeyd edib ki, o işdən azad olunması ilə bağlı ərizəyə qol çəkməyib: “Mənim klinika ilə iş müqaviləm, sertifikatlarım, vergi, sosial ödənişlərim, hamısı qaydasındadır. Əslində indi klinika mənə təzminat ödəməlidir”.

Xatırladaq ki, A.Əliyev martın 7-də Toplum TV-nin təsisçisi Ələsgər Məmmədlinin “İstanbul” klinikasının önündə saxlanılma videosunu öz sosial şəbəkədəki hesabından paylaşıb. Daha sonra o, Ə.Məmmədlinin həbsi ilə bağlı mediaya müsahibə verib.

Məsələ ilə bağlı “İstanbul” klinikasının rəhbərliyindən münasibət öyrənmək mümkün olmayıb.