• 14 Aprel 2024 01:47

Fransanın sabiq prezidenti Sarkozi seçki kampaniya vəsaəitlərinə görə yenidən təqsirli bilinib

Fev 15, 2024

Çərşənbə günü Parisin Apellyasiya Məhkəməsi aşağı məhkəmənin əvvəlki qərarını təsdiqləyərək, keçmiş prezident Nikola Sarkozinin 2012-ci ildə yenidən seçilmək iddiası ilə bağlı uğursuz kampaniyanın qanunsuz maliyyələşdirilməsində təqsirli bilinib. Lakin vəkili onun işini Fransanın ən yüksək məhkəməsinə aparacağını bildirib.

Sarkoziyə bir il həbs cəzası verildi, bunun yarısı şərti idi və bu cəza həbsxanaya getmədən elektron qolbaq taxmaq kimi alternativ üsullarla həyata keçirilə bilərdi.

69 yaşlı Sarkozi 2021-ci ildə ilk dəfə təqsirli bilinəndə bir il həbs cəzasına məhkum edilmiş, lakin apellyasiya şikayəti verdiyinə görə bu həbs cəzası dayandırılmışdı. Yeni apellyasiya ona çıxarılan hökmün yenidən təxirə salınması deməkdir.

Onun vəkili Vincent Desri jurnalistlərə açıqlamasında Sarkozinin günahsız olduğunu bir daha bəyan edərək, “Bugünkü qərar olduqca şübhəlidir. Ona görə də Kassasiya Məhkəməsinə müraciət edəcəyik” deyib.

Kassasiya Məhkəməsi (Cour de Cassation) ölkənin ən yüksək məhkəməsidir və onun qərarları adətən işin faktlarına deyil, qanunun düzgün tətbiq edilib-edilməməsinə diqqət yetirir. Məhkəməyə müraciətlər illər çəkə bilər.

Sarkozi hökmü dinləmək üçün çərşənbə günü məhkəmədə olub, lakin onu gözləyən jurnalistlərə şərh vermədən gedib.

2007-ci ildən 2012-ci ilə qədər prezident olan Sarkozi seçki kampaniyasının maliyyəsi ilə bağlı müxtəlif hüquqi məsələlərlə bağlı çoxsaylı məhkəmə işlərinə və araşdırmalarına baxmayaraq, mühafizəkarlar arasında nüfuzlu fiqur olaraq qalır və prezident Emmanuel Makronla dostluq münasibətindədir. (Amerikanın səsi)