• 29 Fevral 2024 02:38

Əmircan və Bülbülədə Hepatit A virusuna yoluxma halları müəyyən edilib

Yan 23, 2024

Azərbaycan Səhiyyə Nazirliyi ötən ilin son aylarından başlayaraq, ölkənin ayrı-ayrı ərazilərində hepatit A virusuna yoluxma hallarının qeydə alındığını bildirib. Bununla yanaşı, nazirlik xəstəliyin hansı mənbədən yayıldığı barədə səhih məlumat vermir.

Nazirliyin məlumatında deyilir ki, 2024-cü ilin yanvar ayında xəstəliyin Bakı şəhərinin Suraxanı rayonunun Əmircan və Bülbülə qəsəbələri üzrə müxtəlif orta məktəb və məktəbəqədər təhsil müəssisəsində baş verdiyi müəyyən edilib.

“Nəzərə alsaq ki, hepatit A virusu fekal-oral yoluxma mexanizminə malikdir və adətən çirkli əllər, çirklənmiş su, eləcə də ümumi gigiyenik qaydaların pozulması ilə yayılır, mütəşəkkil kollektivlərdə bu və digər yoluxucu xəstəliklərdən qorunmağın ən effektiv yolu gigiyenik qaydalara və əksepidemik rejimə əməl etməkdir. Bununla yanaşı, təhsil müəssisələrində vaxtlı-vaxtında su-kanalizasiya xətlərinin təftişi, mövcud su anbarlarının, ehtiyat su çənlərinin qeydiyyata alınması, hər il yuyulub-zərərsizləşdirilməsi də vacib şərtlərdəndir”, deyə nazirlik qeyd edir.

Məlumatda həmçinin deyilir ki, monitorinqlər nəticəsində “Azərsu” ASC tərəfindən əhaliyə verilən içməli suyun mikrobioloji göstəricilərinin ölkədə qüvvədə olan dövlət standart və normalarına cavab verdiyi müəyyən edilib.

“Hazırda epidemioloji vəziyyət nəzarət altındadır, yoluxma hallarının sayında azalma müşahidə olunur. Eyni zamanda, su xətləri və çənlərin yuyulub-təmizlənməsi və zərərsizləşdirilməsi istiqamətində də işlər davam etdirilir”, deyə nazirlik qeyd edir.

Nazirlik məlumatda bir tərəfdən xəstəliyin mənbəyinə işarə edir, digər tərəfdən isə suyun mikrobiloloji göstəricilərə cavab verdiyini bildirir. (Contact.az)