• 14 Aprel 2024 03:47

“AbzasMedia”nın direktoru saxlanılıb

Noy 20, 2023

Abzas Media” onlayn medianın direktoru Ülvi Həsənli noyabrın 20-də xaricə səfər edərkən saxlanılıb.

Bu barədə Amerikanın Səsinə vəkil Zibeydə Sadıqova bildirib.

Onun sözlərinə görə, Ülvi Həsənli hazırda Bakı şəhər Baş Polis İdarəsindədir.

“Müstəntiqlə telefonla danışmışam. İndi Bakı şəhət Baş Polis İdarəsinə gedib Həsənlinin saxlanılmasının səbəblərini öyrənəcəm”, vəkil qeyd edib.

Bu gün “AbzasMedia”nın ofisində axtarış aparlıb.

"AbzasMedia"nın ofisində axtarış aparılır
“AbzasMedia”nın ofisində axtarış aparılır

“Abzas Media”-nın baş redaktoru Sevinc Vaqifqızı Amerikanın Səsinə deyib ki, Həsənlinin bu gecə xaricə uçuşu olmalı idi.

“Səhər saat 4.30-da evdən çıxıb, hava limanına yollanıb, amma təyyarəyə minməyib. Onun hava limanında saxlandığını ehtimal edirəm”.

Vaqifqızı hesab edir ki, ehtimal edilən həbsinin səbəbi Ülvi Həsənlinin peşə fəaliyyətidir.

“Həbsin səbəbi kimi “Abzas Media” nın direktoru olmasıdır. Abzas Media Prezident ailəsinin və Prezidentin tabeçiliyində olan məmurların ailələrinin biznesi ilə bağlı araşdırmaları dərc edir. Səbəb məhz budur”, o qeyd edib.

Öz növbəsində hüquq mühafizə orqanlarından Ülvi Həsənlinin saxlanılmasının səbəblərini öyrənmək hələ mümkün olmayıb.

“AbzasMedia” 2016-cı ildə bir qrup gənc vətəndaş cəmiyyəti nümayəndəsi tərəfindən təsis edilib. AbzasMedia ölkənin yüksək rəsmiləri, onların ailə üzvləri, yaxınları ilə bağlı çoxsaylı korrupsiya məzmunlu araşdırmaların müəllifidir.