Azərbaycan Qarabağdakı “antiterror əməliyyatları”nı dayandırdı, Yevlaxda görüş olacaq

Çərşənbə günü axşam saatlarında Qarabağdakı rus sülhməramlıları atəşə tutulub, ölənlər var, TASS xəbər agentliyi Rusiya Müdafiə Nazirliyinə istinadən yazıb.

Azərbaycan Qarabağda çərşənbə axşamı günü başladığı “antiterror əməliyyatlarının” dayandırıldığını bəyan edib və cümə axşamı günü Qarabağın erməni sakinlərinin nümayəndələri ilə “Azərbaycan Konstitusiyası və qanunları əsasında reinteqrasiya məsələlərinin” müzakirə edilməsi üçün Yevlaxda görüş keçirəcək, bu barədə Azərbaycan hökuməti açıqlayıb.

Bundan bir az əvvəl Qarabağdakı de-fakto hakimiyyət “əhalinin fiziki təhlükəsizliyi” üçün “müvafiq addımlar atmağa məcbur” olduqlarını demişdi, separatçı “Müdafiə ordusu” X hesabında yazıb.

Azərbaycan Müdafiə Nazirliyi çərşənbə günü də səhər saatlarında “Qarabağdakı lokal xarakterli antiterror tədbirlərinin davam etdiyini” açıqlamışdı.

Rəsmi Bakı əməliyyatların yalnız Qarabağdakı “erməni silahlı birləşmənin təslim olduğu və separatçı qurumun özünü buraxdığı təqdirdə dayana biləcəyini” vurğulamışdı.

Qarabağ ermənilərinin nümayəndələri Bakı ilə danışmağa hazır olduğunu bildirmiş, Bakı onları reinteqasiya məsələlərini müzakirə etmək üçün Yevlaxa dəvət etmişdi.

Qarabağda əməliyyatlar necə başladı? Xankəndidə vəziyyət necədir? BBC Azərbaycanca bu və digər suallara cavab tapmağa çalışıb.

Əməliyyatlar hansı şərtlərlə dayandırılıb?

Çərşənbə günü axşam saatlarında Rusiya sülhməramlılarının olduğu maşın Qarabağda “atəşə tutulub, ölənlər var”, TASS xəbər agentliyi yazıb.

Agentliyin Rusiya Müdafiə Nazirliyinə istinadən yaydığı məlumata görə, Rusiya sülhməramlılarına məxsus avtomobil “Canyataq kəndi yaxınlığındakı müşahidə postundan qayıdarkən” atəşə tutulub və nəticədə sülhməramlı hərbçilərin öldüyü bildirilir.

“Sentyabrın 20-də Canyataq kəndi ərazisində yerləşən Rusiya sülhməramlı kontingentinə məxsus müşahidə postundan qayıdan Rusiya hərbi heyəti ilə dolu maşın kiçik çaplı avtomatlardan atəşə tutulub. Hadisə nəticəsində avtomobildəki hərbçilər həlak olub”, – TASS Rusiya MN-nin bəyanatından çıxarış verib.

Azərbaycan Müdafiə Nazirliyindən BBC News Azərbaycancaya məsələnin araşdırıldığını bildirib.

Əməliyyatları dayandıran Azərbaycan zəmanət alıb ki, yerlərdə olan qüvvələr tərksilah ediləcək. Hərbi mövqelərin tərk edilməsilə bağlı da razılığa gəlinib, bu barədə Azərbaycan Prezidentinin köməkçisi Hikmət Hacıyev çərşənbə günü diplomatik korpus üçün keçirilmiş brifinqdə deyib.

Cənab Hacıyev “Azərbaycanın antiterror tədbirləri ilə bağlı məqsədlərini bildirdiyini də” vurğulayıb.

“Eyni zamanda bütün hərbi avadanlıqlar təhvil veriləcək. Müvafiq olaraq, xüsusi toplaşma məntəqələri Azərbaycan tərəfindən təmin edilib. Artilleriya qurğuları, tankların Azərbaycan hökumətinə təhvil verilməsi Rusiya qüvvələri ilə koordinasiyalı şəkildə təmin edilib. Azərbaycan artıq sabahkı ilkin kontakta hazırdır. (Azərbaycan hökuməti) Ermənistanın Qarabağdakı sakinləri ilə daha geniş müzakirələrə reinteqrasiya prosesi ilə bağlı Azərbaycan qanunları və konstitusiyası çərçivəsində hazırdır. Azərbaycan hamar inteqrasiya prosesinə hazır olduğunu bir daha bəyan edir”, – cənab Hacıyev vurğulayıb.

Hikmət Hacıyev “yerli kanallar vasitəsilə Qarabağın erməni sakinlərinin humanitar ehtiyaclarını yerlərdə dinləməyə hazır olduqlarını da” bəyan edib.

Prezidentin köməkçisi “Azərbaycanın bölgədəki antiterror tədbirləri məhdud və lokal şəkildə həyata keçirildiyini” vurğulayıb.

Bəzi ölkələrin çevik bəyanatlarının Azərbaycan hökumətini narahat etdiyini vurğulayan Hikmət Hacıyev “Azərbaycanın legitim narahatlığının diplomatik kanallarla tərəfdaşların diqqətinə çatdırıldığını” deyib.

“Birtərəfli bəyanatların sülh gündəliyinə xidmət etdiyini düşünmürük”, – Hikmət Hacıyev vurğulayıb.

Gələcəkdə Ermənistan-Azərbaycan arasında münasibətlərin normallaşmasına ümid olduğunu deyən Hikmət Hacıyev Ermənistanın davranışları ilə açıqlamalarının fərqli olmasına diqqət çəkib. “Ermənistan Azərbaycan ərazi bütövlüyünü qəbul etdiyini bəyan edir, ancaq etdikləri bunun əksini deyir”.

Prezidentin köməkçisi, BMT Təhlükəsizlik Şurasının Qarabağla bağlı iclasının keçirilməsinə ehtiyac olmadığını diqqətə çatdırıb.

O qeyd edib ki, bu cür mühüm məsələlər yerlərdə lokal səviyyədə həll tələb edir: “Belə bir iclas çağırılarsa, heç də xeyirli və səmərəli olmayacaq. Biz istəməzdik ki, bu kövrək vəziyyət daha da pisləşsin. Yəni bu iclasın keçirilməsinə ehtiyac yoxdur. Olarsa, Azərbaycan öz legitim narahatlığını ifadə etməyə hazırdır”.

Azərbaycan Qarabağda “antiterror əməliyyatların” dayandırıldığını bəyan edib. Cümə axşamı günü Qarabağın erməni sakinlərinin nümayəndələri ilə “Azərbaycan Konstitusiyası və qanunları əsasında reinteqrasiya məsələlərinin” müzakirə edilməsi üçün Yevlaxda görüş keçirəcək, bu barədə Prezident Administrasiyası bu gün açıqlayıb.

Azərbaycan Müdafiə Nazirliyi çərşənbə günü bildirib ki, saat 13:00-dan etibarən Qarabağ erməniləri ilə bölgədə lokal xarakterli antiterror tədbirlərinin dayandırılması haqda razılığa gəlib.

Azərbaycan MN açıqlayıb ki, razılaşmaya əsasən, Qarabağ bölgəsində yerləşən “Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoymalı, döyüş mövqelərindən və hərbi postlardan çıxarmalı və tam şəkildə tərksilah olunmalıdırlar”.

Məlumatda deyilir ki, Ermənistan silahlı qüvvələrinin birləşmələrinin Azərbaycan ərazilərini tərk etməsi və qeyri-qanuni erməni silahlı dəstələrin buraxılması, bütün silah-sursat və ağır texnikanı təhvil verilməsi ilə bağlı razılıq əldə olunub.

Azərbaycan Müdafiə Nazirliyi əlavə edib ki, bu proses Rusiya sülhməramlı kontingenti ilə əlaqələndirilmiş şəkildə həyata keçiriləcək.

Ermənistan heç bir formada Rusiya sülhməramlıları ilə razılaşdırılmış atəşkəs sazişinin mətninin hazırlanmasında iştirak etməyib, Armenpress yazır ki, bu barədə Ermənistanın Baş naziri Nikol Paşinyan çərşənbə günü canlı yayımda bildirib.

Onun sözlərinə görə, “Dağlıq Qarabağ hökumətinin” Rusiya sülhməramlılarının atəşkəs təklifini qəbul etməsi xəbəri separatçı quruma məxsus məlumat səhifələrindən məlum olub.

“Əlbəttə, biz mətnlə tanış olmuşuq. Lakin Ermənistanın bu mətnin hazırlanmasında və müzakirələrdə iştirak etmədiyinə görə, mətndə ilk diqqət çəkən nüans “Ermənistan silahlı qüvvələri və Ermənistan silahlı qüvvələrinin qalan hissələri” qeydləridir. Biz 2021-ci ilin avqustundan Dağlıq Qarabağda Ermənistan ordusunun olmadığını dəfələrlə açıqladığımıza görə, bu bəyanat bizə aydın deyil. Amma istənilən halda, biz bu bəyanatı və onun Dağlıq Qarabağ hakimiyyəti tərəfindən qəbul edilməsini nəzərə alırıq”, – Baş nazir bildirib.

“Moskva Yerevan və Bakı rəhbərliyi ilə sıx əlaqədədir”, Azərtac yazır ki, bunu Rusiya Prezidenti Vladimir Putin çərşənbə günü Çinin xarici işlər naziri Wang Yi ilə görüşündə deyib.

O qeyd edib ki, rus sülhməramlıları Qarabağda bütün tərəflərlə aktiv işləyir.

“Ümid edirəm ki, biz gərginliyin azaldılmasına nail olacağıq və bu problemin həllini dinc yola keçirə biləcəyik”, – Vladimir Putin vurğulayıb.

Azərbaycan Müdafiə Nazirliyinin sözçüsü Anar Eyvazov deyib ki,Qarabağdakı “erməni döyüşçülərin könüllü şəkildə döyüş mövqelərini tərk etməsi üçün də şərait yaradılır, onlara bu halda heç bir zərbə endirilməyib”.

Ermənistan xarici işlər nazirinin müavini Vahan Kostanyan “Qarabağdakı ermənilərin nəzəri olaraq Azərbaycanın hakimiyyəti altında yaşaya biləcəyini, lakin baş tutacaq dialoqun həyati əhəmiyyət kəsb etdiyini” deyib, BBC türkçə yazıb.

Atəşkəs razılaşması əldə edildikdən sonra sosial mediada Xankəndidə olan bəzi fəallar yazıblar ki, razılaşma olmasına baxmayaraq, yenə də atəş səsləri eşidiblər.

Azərbaycan Müdafiə Nazirliyinin sözçüsü Anar Eyvazovun sözlərinə görə, Azərbaycan tərəfi texniki və muşahidə vasitələri ilə “erməni döyüşçülərin şəxsi heyətinin geriyə çəkilməsini” müşahidə edib.

Əməliyyatlar niyə başladı?

Sentyabrın 19-u günün birinci yarısına kimi Qarabağda 11 azərbaycanlı həlak olub, onlardan altısı Xocavənddə eyni istiqamətdə mina partlaması nəticəsində, beşi yol qəzasında həyatını itirib.

Azərbaycan mina partlayışını “terror aktı” adlandırıb və bəyan edib ki, hər iki hadisə “qanunsuz erməni silahlı birləşmələrinin əraziyə mina yerləşdirməsi” nəticəsində baş verib.

Azərbaycan Müdafiə Nazirliyi (MN) erməni silahlıları onun mövqelərini “sistemli atəşə tutmaqda” ittiham edib.

Bir qədər sonra Azərbaycan Müdafiə Nazirliyi “Qarabağda lokal xarakterli antiteror əməliyyatlarına başladığını” açıqlayıb.

Bir neçə ay idi ki, Qarabağda vəziyyət gərgin idi və Azərbaycanın belə bir əməliyyata başlayacağı gözlənilirdi.

Qarabağda əməliyyat başlayandan sonra rəsmi Yerevan Bakını “etnik təmizləmədə” ittiham edib. Azərbaycan isə deyib ki, Qarabağda mülki əhali və mülki infrastruktur hədəfə alınmır, yalnız “legitim hərbi obyektlər” zərərsizləşdirilir.

Çərşənbə günü Müdafiə Nazirliyinin sözçüsü polkovnik Anar Eyvazov keçirdiyi brifinqdə “Qarabağda yaşayan erməni sakinlərinə Ermənistan silahlı qüvvələrinin birləşmələrinə yaxın durmamaq və onlara dəstək olmamaqla bağlı” çağırış edib.

“Hərbi qulluqçularımız bu çağırışlarımızı çap edilmiş məlumat vərəqələrində müxtəlif vasitələrlə yerli əhaliyə və silahlılara çatdırır”, – cənab Eyvazov deyib.

Azərbaycan MN ötən gecə baş verən hərbi əməliyyatlarla bağlı videogörüntülər yayıb.

“Ermənistan tərəfinə məxsus döyüş mövqeləri, hərbi təyinatlı avtomobillər, artilleriya və zenit-raket qurğuları, radioelektron mübarizə stansiyaları və digər hərbi təyinatlı vasitələr zərərsizləşdirilib”, – Azərbaycan MN bildirib.

Rəsmi Yerevan çərşənbə axşamı bəyan edib ki, Qarabağda Ermənistan ordusu yoxdur.

Qarabağdakı separatçı qurumun “Müdafiə ordusu” çərşənbə günü X (keçmiş Twitter) hesabında bildirib ki, təmas xəttində döyüşlər müxtəlif intensivliklə davam edib və Azərbaycanı mülki infrastruktur obyektlərini də hədəfə almaqda ittiham edib.

Azərbaycan MN bu ittihamı rədd edərək çərşənbə günü keçirdiyi brifinqdə bəyan edib ki, Azərbaycan ordusu “mülki əhalini və mülki infrastrukturu hədəfə almır”.

Çərşənbə axşamı Şuşa Dövlət Qoruğu İdarəsinin mühəndisi qəlpə yarasından həlak olub, Azərbaycan hüquq-mühafizə orqanları rəsmiləri keçirdikləri brifinqdə açıqlayıblar və atəşi erməni hərbçilərin açdığını deyiblər.

Əməliyyatlar zamanı Qarabağın erməni əhalisi arasında 25 nəfərin öldüyü, 138 nəfərin yaralandığı xəbər verilir. Olənlərdən ikisi, yaralılardan isə 29-u mülki şəxsdir, məlumatlarda deyilir.

Azərbaycan tərəfi çərşənbə axşamı Ağdamda bir mülkü şəxsin yaralandığını açıqlayıb.

Azərbaycan Müdafiə Nazirliyi bildirib ki, Qarabağın rus sülhməramlıların məsuliyyət zonasında apardığı əməliyyatlar nəticəsində “Ermənistan silahlı qüvvələrinin 60-dan çox döyüş mövqeyi” Azərbaycan ordusunun nəzarətinə keçib.

Rəsmi Yerevan Qarabağda Ermənistana məxsus hərbi birləşmə olmadığını bəyan edib.

Bu arada Yerevanda hökumət binası və Rusiyanın bu ölkədəki səfirlik binası qarşısında etiraz aksiyasının davam edir, Ermənistan mediası yazır.

Etirazçılar hökumət binası qarşısında polis maneələrini yararaq binaya daxil olmağa çalışıblar. TASS agentliyinin yazdığına görə aksiya iştirakçıları Rusiya səfirliyinin çıxışını da bağlayıblar.

Yerevan polisinin etirazçılara qarşı səs qumbaralarından istifadə etdiyi bildirilir.

Xankəndində vəziyyət necədir?

Qarabağdakı separatçı qurumun “prezidenti” Samvel Şahramanyan “Təhlükəsizlik Şurasının” iclasında deyib ki, “Dağlıq Qarabağda yaranmış vəziyyətə və onun aradan qaldırılmasına beynəlxalq aktyorların reaksiyası qeyri-adekvatdır”, Azadlıq Radiosunun erməni xidməti çərşənbə günü yazıb.

Separatçı qurumun “Müdafiə ordusu”nun X (keçmiş Twitter) səhifəsində qurumun keçmiş rəhbərləri Arayik Harutyunyan və Bako Saakyanın da iştirakı ilə on nəfərdən çox adamın görüşü barədə video görüntülər yayılıb.

Azadlıq Radiosunun erməni xidməti yazıb ki, Samvel Şahramanyan “əhalinin fiziki təhlükəsizliyinin təmin olunmasının zəruriliyi müvafiq addımlar atmağa məcbur edir” deyib.

Amma konkret hansı addımların nəzərdə tutulduğu açıqlanmır.

Rəsmi Bakı bəyan edib ki, Qarabağdakı “antiterror əməliyyatların” dayanması üçün Qarabağdakı separatçı qurum silahı yerə qoymalı və özünü buraxmalıdır.

Azərbaycan Qarabağ erməniləri ilə reinteqrasiya məsələlərini müzakirə etməyə hazır olduğunu bir daha vurğulayıb.

Rusiya sülhməramlıları 2000-dən artıq sakini Dağlıq Qarabağdan çıxarıb, çərşənbə günü TASS Rusiya Müdafiə Nazirliyinə istinadən yazıb.

“Ümumilikdə 2 mindən çox mülki şəxs təxliyə edilib. Onlar müvəqqəti sığınacaqla təmin olunub, həkimlər yaralılara yardım edir. Təxliyə olunanlardan 1049-u uşaqdır”, – qurum bildirir.

Rusiya MN deyib ki, “sülhməramlı kontingent Dağlıq Qarabağ ərazisində 30 müşahidə məntəqəsində gecə-gündüz vəziyyətə nəzarət edir”.

Qurum çərşənbə axşamı bildirmişdi ki, 469 nəfərin, o cümlədən 185 uşağın Rusiya sülhməramlı kontingentinin olduğu yerə təxliyə edildiyini bildirib.

“Xüsusi təyinatlı tibb dəstəsinin tibb işçiləri dördü uşaq olmaqla doqquz yaralı vətəndaşa yardım göstərib”, – Rusiya Müdafiə Nazirliyi çərşənbə axşamı bildirib.

Rusiya sülhməramlılarının Qarabağdakı komandanlığı münaqişə tərəflərini dərhal atəşkəsə və danışıqlar prosesini davam etdirməyə çağırıb.

Qarabağdakı separatçı qurumun “ombudsmanı” Gegham Stepanyan X (keçmiş Twitter) hesabında iddia edib ki, “Azərbaycanın Dağlıq Qarabağda davam edən hücumları nəticəsində biri uşaq olmaqla, ən azı iki nəfər ölüb, 11 nəfər yaralanıb”.

Azərbaycan MN deyir ki, əhalinin təhlükəli ərazidən təxliyəsini təmin etmək üçün Laçın yolu üzərində və digər istiqamətlərdə “humanitar dəhliz və qəbul məntəqələri” yaradılıb.

Tanınmamış “Artsax” hökuməti rəhbərliyi “dərhal Azərbaycanı atəşkəsə əməl etməyə və danışıq masası arxasına oturmağa çağırıb”, separatçı qurumun yerli mediası yazıb.

Rəsmi Bakı bu çağırışa cavab olaraq bildirib ki, “antiterror tədbirlərinin dayandırılması üçün qanunsuz erməni silahlı dəstələri ağ bayraq qaldırmalı, bütün silahlar təhvil verilməli, qanunsuz rejim özünü buraxmalıdır. Əks təqdirdə, antiterror tədbirləri sona qədər davam etdiriləcək”, Azərtac yazır.

Azərbaycan reinteqrasiya məsələlərini müzakirə etmək üçün ölkənin Qarabağ bölgəsində yaşayan ermənilərin nümayəndələri ilə Yevlaxda görüşə hazır olduğunu bildirib.

Qarabağda yaşayan jurnalist Marut Vanyan sosial media hesabında yazıb ki, çərşənbə günü “Stepanakertdə həyacan siqnalı” eşidilib və “uşaqlar və valideynlər təcili zirzəmiyə enib”.

“Şuşa tərəfdən müxtəlif istiqamətlərdə partlayış səsləri eşitdim. Birinci partlayış səsi çox yaxından eşidildi, səslər kəsilmir. Artilleriya işləyir, fasiləsiz atəş açılır”, – o deyib.

“Qarabağdakı əməliyyatlar başlayandan sonra rus sülhməramlıları uşaqları və qadınları Laçından, Həkəri körpüsündən çıxarmalı idilər, lakin azərbaycanlılar rusların maşınlarını atəşə tutdular, ona görə onlar uşaqları çıxara bilmədi. İndi hamısı buradadır, heç biri çıxmayıb”, – Qarabağın Mets Şen kəndində yaşayan tibb bacısı Sevan Mandjikyan Azadlıq Radiosunun erməni xidmətinə deyib.

Azərbaycan Müdafiə Nazirliyi çərşənbə günü bildirib ki, Azərbaycan tərəfinin Rusiya sülhməramlıların “avtomobillərinə atəş açması ilə bağlı yayılan xəbərlər yalandır”.

“Bu xəbərlərin heç bir əsası yoxdur. Biz Rusiya sülhməramlıları ilə əlaqədəyik və onların öz işlərini görmələri üçün tərəfimizdən hər cür şərait yaradılır”, -qurumun sözçüsü Anar Eyvazov sentyabrın 20-də keçirdiyi brifinqdə bildirib.

Azərbaycan MN mülki erməni əhalini Ermənistanın oradakı “hərbi birləşmələrinin yerləşdirildiyi infrastruktur ərazilərdən uzaq olmağa” çağırıb.

Ermənistanın reaksiyası nədir?

Ermənistan Xarici İşlər Nazirliyi Azərbaycanın “Dağlıq Qarabağa qarşı təcavüzünü” pisləyib və bu əməliyyatı “kütləvi cinayət” adlandırıb və Azərbaycanı “etnik təmizləmə” aparmaqda ittiham edib.

Azərbaycan Ermənistanın “etnik təmizləmə” ittiamını rədd edir. Rəsmi Bakı bir neçə dəfə Qarabağ ermənilərinin təmsiçilərini danışığa dəvət edib, amma qarşı tərəf bundan imtina edib.

Azərbaycan deyir ki, Ermənistan Qarabağdan hərbi birləşmələrini çıxarmayıb və bu da hərbi vəziyyəti gərginləşdirir.

Ermənistan Müdafiə Nazirliyi bu gün yaydığı bəyanatda Qarabağda onlara məxsus “hər hansı hərbi birləşmənin” olmadığını bildirib.

Ermənistanın Baş naziri Nikol Paşinyan çərşənbə axşamı Təhlükəsizlik Şurasınıın iclasını çağırıb.

“İclasda Azərbaycan tərəfinin Dağlıq Qarabağa qarşı başladığı genişmiqyaslı döyüş əməliyyatları müzakirə olunur”, – Ermənistan hökumətinin mətbuat xidmətinin məlumatında deyilir.

Emənistanın Baş nazir Nikol Paşinyan Azərbaycanı Ermənistanı hərbi eskalasiyaya cəlb etmək cəhdində ittiham edib və bunu “yolverilməz” adlandırıb.

O, sosial şəbəkədə canlı yayımlanan video-müraciətində deyib ki, Azərbaycanla sərhəddə vəziyyət “nisbətən stabil“dir, amma “Bakının əsas məqsədi öz hərəkətləri ilə Ermənistanı hərbi əməliyyatlara cəlb etməkdir”.

Nikol Paşinyanın sözlərinə görə, Azərbaycan rəsmi mənbələri Azərbaycan hərbçilərinin Ermənistan hərbi qüvvələrinə zərbə endirdiyini bildirir və Ermənistanın hərbi əməliyyatlarda iştirak etmədiyinə baxmayaraq, hətta “Yerevanın bəzi tərəfdaşları” da həm Ermənistanı, həm də Azərbaycanı hərbi əməliyyatları dayandırmağa çağırır.

“Bir daha, növbəti dəfə vurğulamaq istəyirəm ki, Dağlıq Qarabağda Ermənistan ordusu yoxdur”, – Paşinyan deyib.

Onun sözlərinə görə, Ermənistan hakimiyyəti vəziyyətin “emosional məqamını anlayır və prosesə nəzarət edəcək”.

“Müəyyən siyasi qüvvələrə və xadimlərə Ermənistanın dövlətçiliyini zərbə altına qoymağa imkan verilməməlidir”, – Baş nazir əlavə edib.

Nikol Paşinyanın çıxışından sonra Yerevanda hökumət evinin qarşısında etirazlar başlayıb.

Etirazçılar Ermənistan hakimiyyətindən Qarabağdakı əməliyyatlara müdaxilə etməyi tələb ediblər.

Dünya nə reaksiya verib?

ABŞ-ın Dövlət katibi Antony Blinken çərşənbə günü Azərbaycan Prezidenti İlham Əliyevə və Ermənistanın Baş naziri Nikol Paşinyana zəng edib.

Dövlət Departamentinin məlumatına görə, Antony Blinken Azərbaycan prezidenti İlham Əliyevlə “Dağlıq Qarabağda” hərbi əməliyyatları dərhal dayandırmağa və vəziyyəti eskalasiya etməməyə çağırıb.

“Dövlət katibi vurğulayıb ki, hərbi yolla həll yoxdur və tərəflər Bakı ilə “Dağlıq Qarabağdakı” etnik ermənilər arasında mövcud olan mübahisələri həll etmək üçün dialoqu bərpa etməlidirlər”, – ABŞ Dövlət Departamenti bildirib.

Dövlət Departamentinin saytı yazıb ki, “Prezident Əliyev hərbi əməliyyatları dayandırmağa, Azərbaycan nümayəndələri ilə “Dağlıq Qarabağ” əhalisinin görüşməsinə hazır olduğunu bildirib və bunun dərhal həyata keçirilməsinin zəruriliyini vurğulayıb”.

Azərbaycan Prezidentinin saytının məlumatına görə, İlham Əliyev ABŞ Dövlət katibinə “Silahın yerə qoyulduğu və tərksilah olunduğu halda, antiterror tədbirlərinin dayandırılacağını deyib”.

Dövlət katibi Antony Blinken Ermənistanın Baş naziri Paşinyanla da telefon söhbətində Birləşmiş Ştatların Dağlıq Qarabağdakı vəziyyətlə bağlı dərin narahatlığını ifadə edib və ABŞ-ın Azərbaycanı hərbi əməliyyatları dərhal dayandırmağa və dialoqa qayıtmağa çağırdığını vurğulayıb.

O, Baş nazir Paşinyana ABŞ-ın Ermənistanın suverenliyini, müstəqilliyini və ərazi bütövlüyünü tam dəstəklədiyini bildirib.

Ötən gün Azərbaycan Qarabağda əməliyyatlara başlayandan sonra ABŞ-ın Dövlət katibi Antony Blinken Qarabağdakı hərbi tədbirlərindən “dərin narahatlıq” keçirdiklərini bildirib, Dövlət Departamentinin rəsmi saytında qeyd olunmuşdu.

“Dağlıq-Qarabağda Azərbaycan tərəfinin başlatdığı hərbi tədbirlərdən dərin narahatlıq keçirir və rəsmi Bakını bunu dərhal dayandırmağa çağırırıq. Bu cür addımlar Dağlıq-Qarabağdakı humanitar vəziyyəti daha da pisləşdirməklə yanaşı, sülh imkanlarını da azaldır. Daha əvvəl də fikrimizi Azərbaycana açıq şəkildə çatdıraraq, ziddiyyətlərin güc yolu ilə həllinin qəbuledilməz olduğunu bildirmişik”, – qurumun bəyanatında bildirilib.

Bundan əlavə, Antony Blinken tərəflər arasında düşmənçiliyə “dərhal son qoyulmasına”, eləcə də Bakı və Qarabağ ermənilərinin nümayəndələrini dialoq aparmağa çağırıb.

Türkiyə Xarici İşlər Nazirliyi Azərbaycanın Qarabağda başlatdığı hərbi tədbirlərlə bağlı yaydığı məlumatda rəsmi Bakı və Yerevan arasında nəticəyə yönəlik danışıqların regionda sülh, təhlükəsizlik, rifah və davamlı sabitlik üçün “yeganə yol” olduğunu bildirib.

“Azərbaycanın Qarabağ bölgəsində olan qeyri-qanuni erməni silahlı ünsürlərinin uzun müddətdir Azərbaycan ordusuna və hüquq mühafizə orqanları əməkdaşlarına qarşı davam edən silahlı hücumları və təxribatları Azərbaycanı bu gün anti-terror əməliyyatı başlatmağa məcbur edib”, – Türkiyə XİN-nin məlumatında qeyd olunub.

Ankara Azərbaycanın Qarabağda başlatdığı hərbi tədbirləri rəsmi Bakının “haqlı tələblərinin yerinə yetirilməməsi” ilə izah edib.

İranın Xarici İşlər Nazirliyinin sözçüsü də Qarabağda baş verənlərdən narahat olduqlarını deyib, İran mediası yazıb.

Rəsmi Tehran tərəfləri üçtərəfli atəşkəs razılaşmasının şərtlərinə əməl etməyə və məsələni dialoq yolu ilə həll etməyə çağırıb.

Avropa İttifaqı Qarabağda “cəbhə xətti boyu hərbi eskalasiyanı qınadığını” bildirib.

Qurumun xarici siyasət üzrə rəsmisi Josep Borrell X (keçmiş Twitter) səhifəsində eskalasiya nəticəsində insan itkisindən təəssüfləndiyini deyib və Azərbaycanı mövcud hərbi hücumları dayandırmağa çağırıb.

“Bakı və Qarabağ erməniləri arasında təcili şəkildə dialoqun qurulmasına ehtiyac var. Hərbi eskalasiya yerli əhalinin məcburi köçürülməsi üçün istifadə edilməməlidir”, – Avropa İttifaqının Qarabağda baş verənlərlə bağlı bəyanatında qeyd olunub.

Qurum, həmçinin sülh mühitinin yaradılması və normallaşma ilə bağlı danışıqların davam etdirilməsi üçün “zorakı hərəkətlərin” dayandırılmalı olduğunu diqqətə çatdırıb.

Fransa Azərbaycanı dərhal hücumu dayandırmağa və beynəlxalq hüquqa hörmət etməyə çağırıb.

Fransa Xarici İşlər Nazirliyinin yaydığı məlumatda bildirilir ki, “Dağlıq Qarabağın mülki əhalisinin taleyinə görə məsuliyyət tamamilə Azərbaycanın üzərinə düşür”.

Fransa Azərbaycanın Qarabağda keçirdiyi “hərbi əməliyyatları bərpa etməsini” pisləyib.

Fransa Xarici İşlər Nazirliyi, həmçinin BMT Təhlükəsizlik Şurasının təcili iclasını tələb edib

Avropa Şurasının prezidenti Charles Michel X (keçmiş Twitter) hesabında tərəfləri dialoqa çağırıb.

“Bu gün keçmiş Dağlıq Qarabağ vilayətindən sarsıdıcı xəbərlər gəlir. Bakı ilə Qarabağ erməniləri arasında dialoqa imkan yaradılması üçün Azərbaycanın hərbi fəaliyyətləri dərhal dayandırılmalıdır”.

Rusiya Xarici İşlər Nazirliyinin sözçüsü Mariya Zaxarova qurumun rəsmi X (keçmiş Twitter) hesabında Ermənistan və Azərbaycanı hərbi addımları dayandırmağa və məsələnin siyasi-diplomatik yolla həll etməyə çağırıb.

“Qarabağ probleminin sülh yolu ilə həllinə dair bütün addımlar Rusiya, Azərbaycan və Ermənistan liderlərinin imzaladıqları üçtərəfli bəyanatda göstərilib. Ermənistan-Azərbaycan sülh razılaşması iki ölkə arasında maraqlar balansını təmin etməklə davamlı və uzunmüddətli sülhə zəmin yaratmalıdır. Buna kağız üzərində razılaşdırılan bütün yol xəritələrini yerinə yetirməklə nail olmaq mümkündür”, – Zaxarova bildirib.

Azərbaycan Xarici İşlər Nazirliyi Aİ və Fransanın bəyanatlarını pisləyib və bəyan edib ki, suveren ərazilərində beynəlxalq hüquq normalarına zidd olaraq istənilən “hərbi mövcudluq regional sülh və təhlükəsizliyə ciddi təhdiddir və Azərbaycanın bugünkü fəaliyyəti bu qanunsuz qüvvələrin sıradan çıxarılmasına və marionet rejiminin dağıdılmasına yönəlib”, – qurumun bəyanatında deyilir.

Azərbaycan nə deyir?

Azərbaycan Müdafiə Nazirliyinin sözçüsü Anar Eyvazov çərşənbə axşamı keçirdiyi brifinqdə “anti-terror əməliyyatları nəticəsində Qarabağda mülki əhalinin və mülki infrastrukturun hədəfə alınmadığını” deyib və mülki erməni əhalini Ermənistanın oradakı hərbi birləşmələrinin yerləşdirildiyi infrastruktur ərazilərdən uzaq olmağa çağırıb.

Azərbaycan Xarici İşlər Nazirliyi bu günki mina partlayışlarını “terror aktı” kimi qiymətləndirib və keçirilən “lokal xarakterli antiterror tədbirləri”nin “erməni hərbi birləşmələrinin zərərsizləşdirilməsi və bölgədən çıxarılması, Azərbaycanın Konstitusiya quruluşunu “bərpa edilməsi” məqsədi daşıdığını bəyan edib.

Rəsmi Bakı vurğulayıb ki, heç bir halda “Azərbaycan tərəfi mülki əhalini hədəf almır. Bu xüsusda, erməni mülki əhalinin hərbi hədəflərdən uzaq durması zəruridir”, – Azərbaycan XİN-in yaydığı məlumatda deyilir.

Azərbaycan MN son məlumatında bildirib ki, ərazidə olan mülki əhalini “hərbi obyektlərdən kənar durmağa və Ermənistan silahlı qüvvələrinin birləşmələrinə dəstək olmamağa çağırır”.

“Bu barədə mobil SMS xidməti vasitəsilə Azərbaycanın Qarabağ bölgəsinin erməni sakinlərinə məlumat göndərilib. Eyni zamanda səsgücləndirici texniki vasitələrlə əhali xəbərdar edilir və məlumat vərəqələri paylanılır”, məlumatda deyilir.

Azərbaycan MN bəyan edib ki, qadınlar, uşaqlar, qocalar, habelə fiziki məhdudiyyətli şəxslər və xəstələrə lazımi tibbi və digər yardımlar göstəriləcək, onlar içməli su və ərzaqla təmin olunacaq.

Azərbaycan Müdafiə və Xarici İşlər Nazirliyi çərşənbə axşamı xüsusi olaraq vurğulayıb ki, Azərbaycan tərəfi “yalnız hərbi obyektləri hədəfə alır və əhalini hərbi obyektlərdən uzaq durmağa çağırır”.

Azərbaycanda Qarabağda keçirilən “antiterror əməliyyatına” görə, bu gündən TikTok sosial şəbəkəsinin fəaliyyətinə müvəqqəti məhdudiyyət tətbiq edilib, Elektron Təhlükəsizlik Xidmətindən BBC Azərbaycancaya bildirilib.

İctimai TV çərşənbə axşamı yaydığı məlumatda Xankəndidə yerləşən Ermənistan silahlı qüvvələrinə məxsus “TOR zenit raket kompleksinin məhv edildiyini” açıqlayıb.

Azərbaycan Müdafiə Nazirliyi yaydığı son bəyanatında bildirib ki, Qarabağda aparılan “antiterror tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarılır”.

Azərbaycan Müdafiə Nazirliyi bəyan edib ki, mülki əhali və infrastruktur obyektləri “hədəfə alınmır, yalnız legitim hərbi hədəflər sıradan çıxarılır”.

Azərbaycan hərbi əməliyyatlarda artıq əsas hədəflərə çatmağa yaxındır, Azərbaycan Prezidentinin köməkçisi Hikmət Hacıyev TRT Haberə deyib.

“Qarşımıza qoyduğumuz əsas hərbi hədəflər artıq neytrallaşdırılmışdır. Bundan sonra qısa müddətli nöqtə əməliyyatları davam etdiriləcək”, – Hikmət Hacıyev qeyd edib.

Qarabağda Azərbaycan Müdafiə Nazirliyinin əməliyyatı davam etməkdə ikən, Xankəndidəki de-fakto hakimiyyət Azərbaycana müraciət edərək onu “düşmənçiliyin dərhal dayandırılması” üçün danışıqlar masasına çağırıb.

Hikmət Hacıyev isə TRT Haber-ə müsahibəsində bildirib ki, Qarabağ erməniləri ilə hər hansı təmasların qurulması üçün “bu qanunsuz rejim özünü buraxmalı və tərksilah olmalıdır”.

Çərşənbə axşamı altı nəfər mülki şəxs Xocavənd rayonu ərazisində eyni istiqamətdə minaya düşərək həlak olub.

Minaya düşənlərdən dördü Azərbaycan Daxili İşlər Nazirliyinin (DİN) əməkdaşı, ikisi isə Azərbaycan Avtomobil Yolları Dövlət Agentliyinin (AAYDA) əməkdaşı olub, hər iki qurum bildirib.

Azərbaycan Müdafiə Nazirliyi bildirib ki, “keçirilən tədbirlər barədə” Rusiya sülhməramlı kontingentinin komandanlığı və Türkiyə-Rusiya Birgə Monitorinq Mərkəzinin rəhbərliyi məlumatlandırılıb.

Azərbaycan hüquq mühafizə orqanlarının birgə yaydığı məlumata görə, “DİN əməkdaşlarının olduğu “Kamaz” markalı nəqliyyat vasitəsi bu gün Əhmədbəyli-Füzuli-Şuşa yolunun Xocavənd rayonundan keçən 58-ci kilometrliyində Azərbaycan Avtomobil Yolları Dövlət Agentliyinin (AAYDA) əməkdaşları ilə eyni istiqamətdə minaya düşüb”.

Bu gün səhər saatlarında AAYDA-nın 50-60 yaşlarında iki əməkdaşı Xocavənd rayonu ərazisində mina partlayışı nəticəsində həlak olub, qurum bildirib.

Azərbaycan DİN, Dövlət Təhlükəsizlik Xidməti və Baş Prokurorluq bildirib ki, hər iki hadisəyə səbəb “sülhməramlıların müvəqqəti yerləşdiyi ərazidə fəaliyyət göstərən qanunsuz erməni silahlı birləşmələrinin təxribat-diversiya qrupu tərəfindən mina yerləşdirməsi ” olub.

Azərbaycanda faktla bağlı cinayət işi başlanıb.

Qarabağdakı separatçı qurumun “müdafiə naziri” Xocavənd rayonu ərazisində AAYDA-nın iki əməkdaşının mina yerləşdirilməsi nəticəsində həlak olmasını “dezinformasiya” adlandırıb, Armenpress xəbər verib.

Azərbaycan Xarici İşlər Nazirliyinin çərşənbə axşamı yaydığı məlumatda qeyd olunur ki, bu gün Xocavənddə baş verənlərlə “İkinci Qarabağ müharibəsindən bəri, ümumilikdə, mina qurbanlarının sayı 314 nəfərə çatdı, onlardan 61 nəfər həlak olub”.

Qurum baş verənləri üçtərəfli bəyanatın 4-cü bəndinin kobudcasına pozulması kimi qiymətləndirib və “Ermənistan və onun yaratdığı qondarma rejimi” bölgədə “hərbi gərginliyi artırmaqda” ittiham edib.