Sentyabrın 15-də səhər saatlarında Xaçmaz rayonunda Qudyalçay çayından keçən avtomobil körpüsü uçub.
FHN-in məlumatına görə, intensiv yağıntılar nəticəsində yaranmış güclü sel suları səbəbindən Xaçmaz rayonu, Köhnə Xaçmaz kəndi ərazisində Gəndob-Xaçmaz-Yalama-Rusiya Federasiyası ilə dövlət sərhədi avtomobil yolunun 27-ci kilometrliyində körpü uçub.
Körpünün uçması nəticəsində iki nəfər xəsarət alıb, onlar xilas edilərək “təcili yardım” briqadasına təhvil verilib.
Yerli sakinlərin sözlərinə görə, bir avtomobil körpüdən çaya düşüb, maşının içində olanların vəziyyəti məlum deyil.
Hazırda Rusiya sərhədi istiqamətində avtomobillərin hərəkəti dayandırılıb. Görünür, sərhəd istiqamətində və əks istiqamətdə hərəkət qonşu Quba şəhərindən keçən alternativ yola keçiriləcək.
TƏBİB-dən Turan-a bildiriblər ki, Xaçmazda körpünün uçmaı nəticəsində Xaçmaz Rayon Mərkəzi Xəstəxanasına 3 kişi yerləşdirilib, onlara tibbi yardım göstərilib.
Belə ki, 1999-cu il təvəllüdlü vətəndaşa alt çənənin əzilmiş yarası, sol mil sümüyünün sınığı diaqnozu qoyulub və vəziyyəti qənaətbəxş olduğundan ambulator müalicə üçün evə buraxılıb.
1966-cı il təvəllüdlü vətəndaşın müalicəsi hazırda tibb müəssisəsinin Cərrahiyyə şöbəsində aparılır. Ona qabırğaların çoxsaylı sınıqları, travmatik şok diaqnozları qoyulub. Vəziyyəti ağır qiymətləndirilir.
Qarının küt travması, sağ bud sümüyünün yuxarı üçdə birinin qapalı yerdəyişən sınığı diaqnozu qoyulan 1984-cü il təvəllüdlü pasiyentin vəziyyəti orta ağırdır. O, ailəsinin istəyi ilə Bakı şəhərində yerləşən tibb müəssisəsinə təxliyə olunur. 06В