• 16 İyun 2024 06:26

2024-cü ildə Kəlbəcərə 12534 nəfər köçürüləcək

Sen 7, 2023

2026-cı ilədək Kəlbəcər rayonunda 1 şəhər, 1 qəsəbə, 13 kənd olmaqla, ümumilikdə 15 yaşayış məntəqəsinin bərpası həyata keçiriləcək.

Bu barədə Dövlət Şəhərsalma və Arxitektura Komitəsi sədrinin birinci müavini Namiq Hümmətov sentyabrın 7-də Kəlbəcərdə keçirilən Şəhərsalma İşçi Qrupunun iclasında bildirib.

Onun sözlərinə görə, bu il Kəlbəcər rayonunda daha 7 yaşayış məntəqəsinin (İstisu qəsəbəsi, Qamışlı, Çaykənd, Nadirxanlı, Qılınclı, Otaqlı və Çıraq kəndləri), gələn il isə 4 kəndin (Çəpli, Keşdək, Dalqılınclı və İmanbinəsi kəndləri) layihələndirilməsi işlərinin aparılması planlaşdırılır.

Hümmətov vurğulayıb ki, Kəlbəcər Şəhərinin Baş Plan konsepsiyası 2022-ci ilin iyunun 26-da Prezidentə təqdim edilib və hal-hazırda baş planın aidiyyəti qurumlarla razılaşdırılması yekun mərhələdədir. 2022-2026-cı illərdə bərpa olunan yaşayış məntəqələrindən birinci mərhələ üzrə Zar, Zallar və Yanşaq kəndlərinin şəhərsalma əsaslandırılmasının təsdiq edilməsi istiqamətində müvafiq işlər aparılmaqdadır.

Dövlət Şəhərsalma və Arxitektura Komitəsi sədrinin birinci müavini həmçinin bildirib ki, Kəlbəcər şəhərinə bütövlükdə tikiləcək evlərə 2024-cü ildə ilk olaraq 5268 nəfər, ümumi yaşayış məntəqələrinə isə 12534 nəfər əhalinin köçürülməsi planlaşdırılır.

O qeyd edib ki, Kəlbəcər rayonunda 2026-cı ilədək 3450 evin (1927 fərdi yaşayış evinin və 1523 mənzilin) tikilərək istismara verilməsi nəzərdə tutulur.

“İllər üzrə bölgüyə gəlincə, 2024-cü ildə 1 115 evin, 2025-ci ildə 725 evin, 2026-cı ildə 1 610 evin inşası həyata keçiriləcək”, deyə o qeyd edib.

Onun sözlərinə görə, cari ilin 8 ayında rayon üzrə 653,46 ha (59,1%) ərazinin minalardan təmizlənməsi həyata keçirilib.