ATƏT-in Parlament Assambleyası Rusiyanı terrorizmin himayədarı, muzdlulardan ibarət “Vaqner” qrupunu isə terrorçu təşkilat kimi tanıyıb. Bu barədə Ukraynanın ATƏT Parlament Assambleyası dakı nümayəndə heyətinin üzvü, Ali Radada “Xalqın qulluqçusu” fraksiyasının sədr müavini Yevgeniya Kravçuk Facebook səhifəsində yazıb.
O, “Bu gün biz ATƏT-in Parlament Assambleyasının Vankuverdə keçirilən sessiyasında, terrorizmin beynəlxalq sülh və təhlükəsizliyə ən böyük təhdidlərdən biri olduğunu bildirən yekun bəyannamənin qəbulu ilə bağlı işi başa çatdırdıq” deyib.
Onun sözlərinə görə, sənəddə deyilir ki, “Vaqner” qrupunun Rusiya hökuməti adından atdığı addımlar haqlı olaraq terrorçuluq kimi səciyyələndirilə bilər. ATƏT-ə üzv dövlətlər “Vaqner” və onun filiallarına qarşı tədbirlər görməli, onları terror təşkilatı elan etməlidir.
Yevgeniya Kravçuk həmçinin qeyd edib ki, bəyannamədə təşkilata üzv dövlətlərə aşağıdakıları tanıyan beynəlxalq standartların sərtləşdirilməsi ilə bağlı müraciət var: “Vaqner”-in terrorçu xarakteri və onun əməlləri; bu terror təşkilatın himayədarı kimi Rusiyanın məsuliyyəti; belə subyektlərin dövlətlərarası münasibətlərə cəlb edilməsinin yolverilməzliyi.
Yanvarın ortalarında Ukrayna prezidenti Volodimir Zelenski Davosda keçirilən İqtisadi Forumda çıxışı zamanı “Rusiya artıq terrorçular arasında yerini seçib. Terrorçu dövlət insanları qətlə yetirir, Ukrayna və onun müttəfiqləri bir ilə yaxındır ki, bununla mübarizə aparır. Bizim müsbət nəticələrimiz var. Bunlar ukraynalılar üçün sərhədlərin açılması, yaşıl siyasət, enerjinin həlli. Bütün bunlar təkcə Ukraynada deyil, hər yerdə insanların həyatını xilas etməyə imkan verir. Təkcə Ukraynanın yox, bütün dünyanın sürətli qərar qəbul edilməsinə ehtiyacı var” deyib.
Avropa Parlamenti və bir sıra Avropa dövlətləri artıq Rusiyanı terrorizmin sponsoru kimi tanıyıb. Öz növbəsində Avropa Şurası Parlament Assambleyası Rusiyanı terrorçu rejim adlandıran qətnamə qəbul edib. (Amerikanın səsi)