“Əhməd Obalı bir neçə gün əvvəl baş-boyun nahiyəsindən əməliyyat olunub. Sağlamlıq durumu getdikcə yaxşılaşır”.
Bu barədə Günaz.tv televiziyasının Bakı ofisinin icraçı direktoru Araz Obalı Amerikanın Səsinə bildirib.
Onun sözlərinə görə, Əhməd Obalının oğlu Dəniz hospitalın reanimasiya hissəsindədir.
“Dənizin səhhəti ilə bağlı heç bir informasiyamız yoxdur. Onu ziyarət etmək üçün heç kimi buraxmırlar. Hətta anası belə övladı barədə düzgün informasiya ala bilmir”, o qeyd edib.
Araz Obalı bildirib ki, Əhməd Obalıya hücum edənlərin 6 nəfər olması və onların saxlanılması ilə bağlı yayılan məlumatlar yanlışdır.
“Hələ hücum edən şəxslər saxlanılmayıb. Hər şey polisin tədqiqatı başa çatdıqdan sonra məlum olacaq,” o qeyd edib.
Güney Azərbaycan Televiziyasının (Günaz.tv) rəhbəri Amerikada mühacir həyatı yaşayan İran Azərbaycanından olan Əhməd Obalı və oğlu Dəniz mayın 17-də Kaliforniya ştatının Santa Klara şəhərində oteldə bir qrup insanın hücumuna məruz qalıb.
Hücum nəticəsində Əhməd Obalının bütün bədəni ciddi zədə alıb, boynu, sağ əlinin bütün barmaqları sındırılıb, gözləri zərbə alıb.
Əhməd Obalı və oğlu hospitala yerləşdirilib.
Əhməd Obalı hazırkı İran hökumətinin kəskin tənqidçilərindədir.(Amerikanın səsi)