Azərbaycanın Tehrandakı səfirliyinin əməkdaşları və onların ailə üzvləri yaxın vaxtlarda təxliyə ediləcək. Bu barədə şənbə günü, yanvarın 28-də Xarici İşlər Nazirliyinin sözçüsü Ayxan Hacızadə məlumat verib. Onun sözlərinə görə, bu məqsədlə Bakı-Tehran-Bakı xüsusi reys təşkil olunub.
Onun sözlərinə görə, terror aktı nəticəsində həlak olan səfirliyin mühafizə xidmətinin rəhbəri Orxan Əsgərovun cənazəsi də Bakıya gətiriləcək.
Mərhumun dəfn mərasimi bazar günü, yanvarın 29-da Bakıda keçirilməlidir. Daha iki yaralanan təhlükəsizlik əməkdaşı Tehran xəstəxanasında əməliyyat olunub.
Xatırladaq ki, yanvarın 27-də səhər saatlarında bir qrup terrorçu Azərbaycanın Tehrandakı səfirliyinə silahlı basqın həyata keçirib. Hücum edənlərdən biri səfirliyin təhlükəsizlik işçisi tərəfindən saxlanılaraq İran hakimiyyətinə təhvil verilib.
Rəsmi Tehran hadisənin səbəbinin hücum edənin ailə problemləri olduğunu bildirib. Bu bəyanat Bakıda qəzəb doğurub, hadisə əvvəlcədən düşünülmüş və hazırlanmış terror aktı hesab olunur. İran tərəfinin belə etinasızlığını nəzərə alaraq, Azərbaycan hakimiyyəti səfirliyi təxliyə etmək qərarına gəlib. (Contact.az)