• 29 Mart 2024 11:38

Şuşa İnsan Hüquqları Təşəbbüsü: nəticə və perspektivlər

Yan 4, 2023

“Bakı insan hüquqları klubu” İctimai Birliyi tərəfindən 2022-ci ildə icra edilmiş ən əhəmiyyətli layihə “Şuşa İnsan Hüquqları Təşəbbüsü” oldu. Layihə Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilmişdir.

Layihənin əsas ideyası indiki mərhələdə Azərbaycandan, növbəti mərhələdə isə həm də xarici ölkələrdən olan gənclər üçün davamlı hüquqi maarifləndirmə fəaliyyətini həyata keçirəcək qeyri-siyasi platformanın yaradılmasından ibarətdir.

Layihə çərçivəsində 23 sentyabr 2022-ci il tarixdə “İtkin düşmüş şəxslər:hüquqi və praktiki problemlər” adlı beynəlxalq konfrans keçirilmiş, tədbirdə mövzu ilə bağlı məruzələr edildikdən sonra müzakirələr aparılmış, yekunda beynəlxalq ictimaiyyətə məsələyə diqqətin artırılması ilə bağlı müraciət ünvanlanmışdır. Konfransda dövlət qurumlarının nümayəndələri, millət vəkilləri, diplomatikkorpus təmsilçiləri və vətəndaş cəmiyyəti təşkilatlarının rəhbərləri iştirak etmişdir.

29 sentyabr-01 oktyabr 2022-ci il tarixlərində isə Şuşa şəhərində və sonrakı iki gündə Bakı şəhərində açıq müsabiqə yolu ilə seçilmiş 12 nəfər gənc iştirakçı üçün insan hüquqları və sülhyaratma mövzularında təlimlər təşkil edilmişdir. Peşəkar hüquqşünaslar tərəfindən tədris edilən təlim həm də iştirakçıların suallarının cavablandırılması və ümumi müzakirələrlə davam etmişdir.

“Bakı insan hüquqları klubu” İctimai Birliyi təşəbbüsün davamlı olması üçün 2023-cü ildə müvafiq təşəbbüs və fəaliyyətlərini davam etdirəcək. Əsas məqsəd layihəyə təkcə Azərbaycandan deyil, həm də xarici ölkələrdən gənclərin cəlb edilməsi, insan hüquqları və sülh mövzularının təşviq edilməsi və regionda sülhün bərqərar olmasına kiçik töhfənin verilməsidir.

Layihə çərçivəsində görülmüş işlər və hazırlanmış vizual materiallarla aşağıdakı sosial şəbəkə kanallarında bizi izləməklə tanış ola bilərsiniz:

Facebook: https://bit.ly/3dLaL98

Instagram: https://bit.ly/3PEvxnW

Twitter:  https://bit.ly/3wgzng3