Bazar günü Qətərdə Əl-Beyt stadionunda futbol üzrə Dünya Çempionatının təntənəli açılış mərasimi keçirilib.
Mərasimdə o cümlədən turnirin Lə’ib adlı (təcrübəli oyunçu mənasını verir – red.) talismanı da tamaşaçılara nümayiş etdirilib.
Qətərdəki futbol çempionatı ilə bağlı xəbərlərdə Dünya Kuboku turnirinin ilk dəfə olaraq Yaxın Şərqdə, müsəlman və ərəb ölkəsində keçirildiyi də qeyd olunur.
Qətər-2022 turnirinin açılış oyununda Qətər və Ekvador milli komandaları qarşılaşıblar.
FİFA Dünya Kuboku noyabrın 20-dən dekabrın 18-dək davam edəcək.
Futbol üzrə Dünya Çempionatının oyunları hər qrupda 4 komanda olmaqla 8 qrupda keçiriləcək. Qrup mərhələsinin oyunları dekabrın 2-də başa çatacaq.
Dekabrın 3-dən 6-dək 1/8 final oyunları keçiriləcək, bundan sonra Dünya Çempionatında oyunlara üç günlük fasilə veriləcək.
Dörddəbir final görüşləri dekabrın 9-da və 10-da, yarımfinal görüşləri dekabrın 13-cü və 14-də, üçüncü yer uğrunda matç dekabrın 17-də, final isə dekabrın 18-də keçiriləcək