ŞƏKLİN MƏNBƏYİ,RUSSIAN DEFENCE MINISTRY/TASS
Rusiyanın müdafiə naziri Ukraynadakı qoşunların komandanı Sergey Surovikinin məruzəsindən sonra, Rusiya qoşunlarının Xersondan çıxarılmasına dair əmr verib.
“Mən razıyam. Qoşunların çıxarılmasını davam etdirin”, – Sergey Şoyqu deyib.
Ukrayna qoşunları payızda Xersonu almaq üçün əks-hücum əməliyyatına başlayıblar.
Çərşənbə günü günortadan sonra Xersondakı inzibati binalardan Rusiya bayraqları götürülüb, hərbi bloqçular xəbər verirlər.
General Sergey Surovikin öz məruzəsində Xersonun təchizatının davam etdirilməsilə bağlı bütün imkanların tükəndiyi deyib.
“Ən məqsədəuyğun variant müdafiəni Dnepr çayının xətti boyunca təşkil etməkdir”, – Surovikin vurğulayıb.
Rusiya qüvvələrinin Xersondan çıxması ilə Dnepr çayının qərb sahilində artıq rusiyalı hərbçilər qalmayacaq.
Bu, Ukraynanın əks-hücumu ilə üzləşən Rusiya hərbiyyəsi üçün əhəmiyyətli itki sayılır.
ŞƏKLİN MƏNBƏYİ,GETTY IMAGES
Rusiyalı general qoşunların geri çəkilməsinin üstün cəhətləri barədə də danışıb.
“Qüvvələr və vasitələrin bir hissəsi əməliyyat zonasında digər istiqamətlərdə, o cümlədən hücum səciyyəli əməliyyatlar üçün istifadə olunacaq”,- Surovikin deyib.
Ekspertlər və hərbi təhlilçilər uzun müddətdir ki, Dnepr çayının iki sahilini birləşdirən Antonovski körpüsünün qismən dağıdılmasından sonra, təchizatı pozulan Rusiya qruplaşmasının Xersondan geri çəkilməsini gözləyirdilər.
Rusiya qoşunları Xersonu Ukraynaya hücumun ilk günlərində ələ keçiriblər.
Sentyrabrın 30-da Vladimir Putin Ukraynanın Xerson, Zaporojye, Donetsk və Luhansk vilayətlərinin rəsmi ilhaqını elan edib və onların Rusiya Federasiyasının dörd yeni regionu olduğunu açıqlayıb.
ŞƏKLİN MƏNBƏYİ,SERGEI MALGAVKO/TASS
Qoşunların geri çəkilməsi barədə əmrdən əvvəl Rusiya minlərlə dinc sakini şəhərdən kənara, öz nəzarəti altında olan ərazilərə çıxarmağa başlamışdı.
Ukrayna bunu məcburi deportasiya kimi pisləyib. (BBC.com)