Ötən gün ərzində erməni silahlı birləşmələri tərəfindən Azərbaycan hərbi mövqeləri ümumilikdə 8 dəfə atəşə tutulub. Bu barədə Müdafiə Nazirliyindən məlumat verilib.
Bunlardan 7-də Azərbaycan-Ermənistan dövlət sərhədinin Basarkeçər, Çəmbərək, Tovuzqala və Gorus rayonları istiqamətlərində yerləşən mövqelərdən Azərbaycan Ordusunun Kəlbəcər, Gədəbəy, Tovuz və Laçın rayonları istiqamətlərində yerləşən mövqeləri müxtəlif çaplı atıcı silahlardan fasilələrlə atəşə tutulub.
Digər 1 hadisə isə Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Kəlbəcər rayonu istiqamətində yerləşən mövqelərininin atəşə tutulması ilə qeydə alınıb.
Məlumata görə, şəxsi heyət və texnika itkisi yoxdur, bütün hallarda Azərbaycan Ordusunun bölmələri adekvat cavab tədbirləri görüb.
Silahlı insident barədə Rusiya sülhməramlı kontingentinin komandanlığına və Rusiya-Türkiyə Birgə Monitorinq Mərkəzinə məlumat verilib. “Bildiririk ki, son vaxtlar Azərbaycan-Ermənistan dövlət sərhədində baş verən gərginliyə görə bütün məsuliyyət Ermənistanın hərbi-siyasi rəhbərliyinin üzərinə düşür”, deyə məlumatda qeyd olunur.