Çərşənbə günü Qarabağda vəziyyətin “gərgin qalması”, həlak olanlar və yaralananlar barədə məlumatlar gəlir.
Müxtəlif erməni mənbələri Rusiya sülhməramlılarının nəzarətində olan bölgədə qarşıdurmaların olmasını iddia edir.
Erməni mənbələri bildirirlər ki, Azərbayan qüvvələri Yeğtsahoğ kəndinə (Sarıbaba kəndi) yaxınlaşaraq ora bitişik təpəni ələ keçirməyə cəhd edib.
Azərbaycan qüvvələrinin Martakertdəki (Ağdərə) Sərsəng su anbarının yaxınlığında Ural hərbi maşınına “zərbə endirdiyi”, bir erməni hərbçisinin öldüyü iddia edilib.
Azərbaycan Müdafiə Nazirlyi bu iddialara münasibət bildirməyib. Qarabağdakı hazırkı vəziyyətlə bağlı BBC-nin sualını cavablandırmayıb.
Azərbaycan bu səhər Laçın istiqamətində bir hərbçisinin həlak olduğunu açıqlamışdı.
Qarabağda Rusiya sülhməramlılarının nəzarətində olan bölgədə yerləşən erməni silahlıları səkkiz hərbçisinin yaralanması və bir nəfərin ölməsi barədə məlumat yayıb.
Separatçı “Dağlıq Qarabağ müdafiə ordusu” məlumat yayıb ki, Azərbaycan silahlı qüvvələri təmas xəttinin şimal-qərb hissəsindən “atəşkəs rejimini” pozaraq onların “mövqelərinə dronlarla zərbələr” endirib.
Daha əvvəlsə Azərbaycan Müdafiə Nazirliyi Azərbaycan ordusunun Laçın istiqamətindəki bölmələrinin səhər saatlarında Rusiya sülhməramlılarının nəzarətində olan bölgədəki “qanunsuz silahlı ermənilər” tərəfindən “intensiv” atəşə məruz qaldığını və nəticəsə bir əsgərin həlak olduğunu bildirib.
Azərbaycan Xarici İşlər Nazirliyi Qarabağdakı insidentə görə məsuliyyətin Ermənistanın üzərinə düşdüyünü bildirib.
Separatçı “Dağlıq Qarabağ polisi” açıqlayıb ki, Şuşa-Berdzor-Goris magistral yolu iki tərəfli açıqdır və Ermənistanla Qarabağda yaşayan ermənilər arasında nəqliyyat əlaqəsi yaradan “Berdzor” humanitar dəhlizində “hər hansı insident qeydə alınmayıb”.
Qarabağda vəziyyətin gərginləşdiyi bir vaxtda Ermənistan Təhlükəsizlik Şurasının katibi Armen Qriqoryan bildirib ki, Azərbaycanın Laçın dəhlizinin başqa marşrutla əvəzlənməsi tələbi “qanunsuzdur”.
ŞƏKLİN MƏNBƏYİ,GETTY IMAGES
Bundan əvvəl separatçı “Qarabağ hakimiyyəti” bəyan etmişdi ki, Azərbaycan Rusiya sülhməramlıları vasitəsilə Ermənistanla Qarabağ arasında fərqli marşrutun istifadə olunması barədə tələb irəli sürüb.
“Armenpress” dövlət agentliyinə müsahibəsində Armen Qriqoryan Azərbaycan, Rusiya və Ermənistan arasında 2020-ci il 10 noyabr tarixli üçtərəfli bəyanatın altıncı bəndinə istinad etdiyini bildirib.
“Bu müddət ərzində bu istiqamətdə müəyyən işlər görülüb, lakin hələ ki, razılaşdırılmış plan yoxdur. Hər halda Ermənistan heç bir planla razılaşmayıb, ona görə də Azərbaycanın tələbi qanunsuzdur”, – Ermənistan Təhlükəsizlik Şurasının katibi deyib.
Azərbaycan bu xəbərə hələ ki, münasibət bildirməyib. (BBC.com)