İranın bir çox şəhərində təqaüdçülər etiraz aksiyaları təşkil edib.
Təbrizdə yürüş keçirən yüzlərlə təqaüdçü İran dövləti və rəsmilərinə qarşı şüarlar səsləndiriblər.
Təqaüdçülər Sosial Müdafiə Təşkilatının baş idarəsinin qarşısından başlayaraq Şərqi Azərbaycan vilayətinin valilik binasına doğru yürüş keçiriblər.
Sosial şəbəkələrdə yayılan videogörüntülərdə aksiyaçıların türk və fars dillərində İran dövləti və rəsmilərinə qarşı şüarlar səsləndirdiyi eşidilir. Belə ki, təqaüdçülər “Baznişəstə (təqaüdçü) nə istir? Haqq-hüququn(u) istir”, “xalqını aldadan dövlətə ölüm!”, “bizim düşmən buradadır – Amerika deyil, yalandır”, “Ustandar (vali)! Sən gəlmədin, biz gəldik”, prezident İbrahim Rəisiyə qarşı “daş başıva Rəisi” və “Rəisiyə ölüm!” kimi şüarlar səsləndirib.
Qeyd edək ki, Sosial Müdafiə Təşkilatının təminatında olan təqaüdçülər keçən aylardan bəri İranın müxtəlif şəhərlərində etiraz aksiyaları təşkil edirlər. Onlar əmək haqqının real yaşayış xərclərinə uyğun olaraq müəyyən edilməsi, sığorta hüquqlarının tanınması və maaşların bərabərləşdirilməsi layihəsinin tam tətbiq edilməsi kimi tələblər irəli sürürlər.