Azərbaycan Avropa Məhkəməsinin qərarlarının icra edilməməsi say göstəricisi üzrə 5-ci sırada yer alıb. Bu barədə hüquqşünas Xalid Ağaliyev AŞ mətbuat xidmətinin dünən yaydığı Avropa İnsan Hüquqlar Məhkəməsinin hesabatını şərh edərkən bildirib.
Onun sözlərinə görə, Azərbaycanda AİHM-nin 271 qərarı icrasını gözləyir. Bir halda ki, qonşu ölkələrdən Gürcüstan 63, Ermənistan isə 50 qərarı icra etməyib.
“Azərbaycandan 2021-ci ildə cəmi 46 qərar icra mərhələsinə daxil olub. 2020-ci ildə bu göstərici 51 olmuşdu”.
Bununla belə, ekspert son üç ildə qərarların icrası göstəricilərinin yaxşılaşdığına diqqət çəkib. Xüsusən, bir sıra ədalətsiz hökmlər ləğv edilib.
Belə ki, 2021-ci ilin noyabrında NİDA hərəkatının keçmiş üzvləri, “Anar Məmmədlinin qrupu”ndan olan 4 ərizəçinin işi üzrə qərarlar ləğv edilib və onlara bəraət verilib.
Amma elə həmin qrupdan Anar Məmmədlinin özü, hüquq müdafiəçisi İntiqam Əliyev, jurnalist Xədicə İsmayılova və gənc fəal Qiyas İbrahimov barəsində qərarlar icra edilməyib.
AŞ Nazirlər Komitəsi AİHM-nin bu şəxslər barəsində qərarlarını icra etməyə çağırıb.
Ötən il Azərbaycan 51 iş üzrə zərəri ödəyib, amma cəmi 23 halda təzminat vaxtında ödənilib. Eyni zamanda, 31 dekabr 2021-ci ilə olan məlumata görə, 58 iş üzrə təzminat ödənilməyib.