Rusiyada məhkəmə həbsdə olan müxalifətçi Aleksey Navalnını mənimsəmədə və məhkəməyə həqarətdə təqsirli bilərək 9 il həbs cəzasına məhkum edib.
Navalnı həmçinin 1.2 milyon rubl cərimələnib.
Bu cəzanın Navalnının hazırda başqa bir ittihamlar çəkdiyi 2 il yarım həbsə paralel hesablanacağı, yoxsa indiki cəza bitəndən sonra başlanacağı bəlli deyil.
Qara həbsxana formasında olan Navalnı hökm oxunan vaxt vəkilləri ilə ayaq üstə dayanıb, sakit görünüb, hakim hökmü oxuyarkən məhkəmə sənədlərinə baxıb.
Rusiya hakimiyyəti Prezident Vladimir Putinin açıq tənqidçisi olan Navalnı və tərəfdarlarını Qərbin dəstəklədiyi təxribatçılar kimi təqdim edir. Navalnının müttəfiqlərinin çoxu Rusiyadan gedib.
***
Rusiyada məhkəmə həbsdə olan müxalifətçi Aleksey Navalnını mənimsəmədə təqsirli bilib. Müxalifətçi 10 ildən artıq həbsə məhkum edilə bilər.
Martın 22-də hakim Marqarita Kotova Moskva kənarında Navalnının saxlandığı təcridxanada hökmü oxumağa başlayıb.
Prokurorlar 13 illik həbs cəzası tələb ediblər.
‘Putinin yaxtası’na da növbə çatdı?
Sibirdə məruz qaldığı zəhərlənmədən Almaniyada müalicə alan Navalnı ötən ilin yanvarında Moskvaya qayıdan kimi həbs olundu və başqa bir ittihamla həbsə göndərildi.
Müxalifətçi son sözündə təqsirsiz olduğunu deyib, prokurorların tələblərinin məhkəmənin korrupsioner təbiətini göstərdiyini vurğulayıb.
34 min dollara yaxın “mənimsəmə”
Navalnıya yeni cinayət işi 2020-ci ilin dekabrında açılıb. 45 yaşlı antikorrupsiya fəalı özünün hazırda qadağan olunmuş Antikorrupsiya Fondundan (FBK) pul mənimsəməkdə və məhkəməyə hörmətsizlikdə suçlanır.
Müstəntiqlər Navalnının 34 min dollar yaxın ianəni şəxsi məqsədlər üçün mənimsədiyini deyirlər. Özü və tərəfdarları isə ittihamları siyasi motivli adlandırır.
Navalnı Almaniyadan qayıdandan bir neçə həftə sonra daha öncə kəsilmiş şərti cəzanın şərtlərini pozmağa görə 2 il yarım həbsə məhkum edilib. Bu məhkumluq da qondarma, siyasi motivli hesab olunub.
Ona yeni hökmün paralel hesablanacağı, yaxud indiki həbsinin üstünə gələcəyi aydın deyil.
Kreml Navalnının zəhərlənməsində əli olmadığını deyir. Qərb müxaifətçinin həbsini qınayıb və Moskvaya sanksiyalar tətbiq edib.