Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti vətəndaşlara son günlərdə bankları hədəf alan “fişinq” hücumları barədə xəbərdarlıq edib.
Xidmət bildirir ki, kiberdələduzlar bu dəfə Azərbaycan Beynəlxalq Bankının (ABB) adından sui-istifadə edərək rəsmi olmayan, lakin real görünən saytlar yaratmaqla insanların diqqətini çəkməyə çalışır.
“Belə ki, ABB-nin rəsmi saytı ilə heç bir əlaqəsi olmayan veb-resursda vətəndaşlara saxta hədiyyə kampaniyası vəd olunur. Saxta kampaniyadan “qazanılan” məbləği əldə etmək üçün isə istifadəçidən bank və digər fərdi məlumatlar tələb olunur. Məqsəd istifadəçiləri “tələyə salmaq”la maddi vəsait əldə etməkdir,” xəbərdarlıqda qeyd edilir.
Kiberhücumlardan qorunmaq üçün vətəndaşların kibertəhlükəsizlik qaydalarına əməl etməsini xahiş edir. “Aldığınız hər mesaja şübhə ilə yanaşın və cəlbedici vədlərə aldanaraq ani hərəkət etməyin. Hədiyyə, pulsuz bonus və mükafat təklif edən vədlərə etimad etməyin. Şübhəli keçidlərə daxil olmayın. Hər zaman məlumatın düzgünlüyünü fərqli əlaqə vasitələrindən istifadə edərək yoxlayın. Hər hansı şirkət, qurum və ya təşkilat adından bu kimi məlumatlar aldıqda, ilk öncə həmin müəssisə ilə əlaqə saxlayaraq və ya veb-brauzerdə açılan yeni səhifədə onun rəsmi saytına daxil olaraq məlumatın düzgünlüyündən əmin olun. Doğruluğundan əmin olmadığınız mesajları digər şəxslərə yönləndirməyin və ya sizə yönləndirilən mesajlara etibar etməyin,” xəbərdarlıqda qeyd edilir.