Ölkədə 1990-cı ilin 20 yanvar hadisələrinin 32 illiyi yad edilir.
Bütün ölkə üzrə saat 12-də 20 yanvar hadisələrində həlak olanların xatirəsi 1 dəqiqəlik sükutla yad edilib.
Sakinlərin Şəhidlər Xiyabanına getməsi üçün bəzi küçə və prospektlərdə nəqliyyatın hərəkətinə məhdudiyyət qoyulub.
20 yanvar hadisələrinin ildönümü ilə bağlı Böyük Britaniya, Türkiyə və İsrail də daxil olmaqla, bır sıra ölkələrin nümayəndələri Azərbaycana başsağlığı veriblər.
Britaniya səfiri 2019-cu ildə Azərbaycanda fəaliyyətinə başlayanda ilk ziyarətinin Şəhidlər Xiyabanına olduğunu yazaraq, o vaxt çəkilən görüntünü paylaşıb.
Türkiyənin xarici işlər naziri Mevlüt Çavuşoğlu tvitter hesabında 20 Yanvar şəhidlərinin xatirəsini “ehtiramla yad” etdiyini bildirib.
İsrailin Azərbaycandakı səfirliyi 20 yanvar hadisələrini Azərbaycan xalqı ilə birlikdə yad etdiyini yazıb.
ABŞ səfirliyi də özünün tvitter hesabında həlak olanların xatirəsini azərbaycanlılarla birgə yad etdiyini bildirib:
“Biz xarici qüvvələrinin ölkəyə yeridilməsi, iğtişaşları yatırtmaq adı ilə mülki əhaliyə qarşı silaha əl atması və əhalinin məruz qaldığı dəhşətli itkiləri xatırlayırıq”.
Qeyd edək ki, 1990-cı ilin yanvarın 19-dan 20-ə keçən gecə on minlərlə Sovet əskəri müstəqillik tələb edən Bakıya tanklarla hücum edərək əliyalın mülki əhaliyə atəş açıb. Rəsmi məlumata əsasən, faciə zamanı 137 insan həlak olub, yüzlərlə adam yaralanıb.