Yasamal Rayon Məhkəməsində Vətəndaş və İnkişaf Partiyasının sədri Əli Əliyevin barəsində olan cinayət işi üzrə məhkəmə prosesi keçirilib.
Məhkəmə prosesi zamanı Əli Əliyevin səhhəti pisləşib. Bu barədə onun vəkili məlumat paylaşıb. O bildirib ki, partiya sədrinin səhhəti pisləşdiyinə görə təcili yardım çağırılıb və həkimlər tərəfindən onun qan təzyiqi 210/130 müəyyən edilib. C. Cavadovun sözlərinə görə, Ə. Əliyevə sahə həkiminə müraciət etmək məsləhət görülüb.
Daha sonra məhkəmə iclası davam etdirilib. Hakim Hüseyn Səfərovun sədrliyi ilə keçirilən məhkəmə iclasında Dövlət Sərhəd Xidmətinin polkovnik-leytenantı Emil Cəfərovun Əli Əliyev barəsində xüsusi ittiham qaydasında şikayəti ilə bağlı hökm oxunub.
Hökmə əsasən, Ə. Əliyev barədə 5 ay müddətinə azadlıqdan məhrum etmə cəzası verilib.
Qeyd edək ki, DSX kapitanı Ramin Ədilovun xüsusi ittiham qaydasında Əli Əliyev barəsində şikayətinə hakim Rauf Daşdəmirovun sədrliyi ilə bir müddət sonra baxılacaq.
DSX-nin Mi-17 tipli helikopterinin Xızı ərazisində qəzaya uğraması nəticəsində yaralanan polkovnik-leytenant Emil Cəfərov məhkəmə qərarı ilə bağlı açıqlama verib:
“Vətəndaş və İnkişaf Partiyasının sədri Əli Əliyev müəyyən cəfəng fikirlərlə, heç bir əsası olmayan fikirlər bildirməklə helikopter qəzası və bizim sağ qalmağımızı şübhə altına alıb. Bu da birinci növbədə bizim şəhid olmuş hərbçi yoldaşlarımızın ruhuna hörmətsizlikdir. Həm fiziki, həm də psixoloji zərbə almış insanlar kimi bizə üçüncü zərbəni də Əli Əliyev vurdu”.
Qeyd edək ki, 2021-ci il noyabrın 30-da qəzaya uğrayan Dövlət Sərhəd Xidmətinə (DSX) məxsus “Mi-17” tipli helikopterdə sağ qalan polkovnik-leytenant Emil Cəfərov və kapitan Ramin Ədilov Vətəndaş və İnkişaf Partiyasının (VİP) sədri Əli Əliyevə qarşı Azərbaycan Respublikası Cinayət Məcəlləsinin 147.1-ci (böhtan) maddəsinə uyğun olaraq xüsusi ittiham qaydasında şikayət veriblər.
Onu da qeyd edək ki, iddiaçıların şikayətlərində bildirilib ki, VİP sədri Əli Əliyev məlum helikopter qəzasından sağ çıxmağın mümkünsüzlüyünü deyib.Bu çıxışından sonra qəza nəticəsində sağ qalan hərbçilər Əli Əliyevi məhkəməyə verib. Onların şikayətləri ayrı icraatda araşdırılır.