“MİDA” MMC-nin direktoru Fərhad Təhməzovun oğlu İsrafil Təhməzli məhkəməyə verilib.
İ.Təhməzlinin Kənd Təsərrüfatı Nazirliyi yanında Aqrar Kredit və İnkişaf Agentliyinə 14 min manata yaxın kredit borcu var.
İttihama görə, İsrafil Təhməzli sahibkarlıq fəaliyyəti üçün agentliklə bağladığı lizinq müqaviləsinin şərtlərindən əmələ gələn öhdəliyi pozub. Ona görə də Aqrar Kredit və İnkişaf Agentliyi İ.Təhməzlini məhkəməyə verib.
Hazırda işə Bakı Kommersiya Məhkəməsində hakim Zeynəb Axundovanın sədrliyi ilə baxılır.
Bir müddət öncə İsrafil Təhməzlinin adı mediada Rusiya və Türkiyədən tikinti materiallarının, xüsusilə kafel-metlaxların idxalı ilə məşğul olan “Başaran Group” şirkətinin həmtəsisçisi kimi hallanmışdı. İddialara görə, İsrafil Təhməzli əmisi oğlu Şahbaz Təhməzli ilə birlikdə həmin biznesə rəhbərlik edir. Kommersiya qurumlarının dövlət reyestrində də həmin şirkətin qanuni təmsilçisi kimi Şahbaz Təhməzlinin adı gedir.
Xatırladaq ki, İsrafil Təhməzlinin atası Fərhad Təhməzov da biznes fəaliyyəti ilə məşğuldur. Onun Türkiyədə “İlahi İnşaat” (İlahi Təhməzli qardaşlarının atasının adıdır) adlı şirkəti var. Şirkət turizm, inşaat və ticarət sektorunda fəaliyyət göstərir. Şirkətin hissələrinin 60 faizi Fərhad Təhməzovun, 40 faizi isə qızı Fidan Təhməzlinin adına rəsmiləşdirilib.
F.Təhməzov əvvəl Məcburi Köçkünlərin Sosial İnkişafı Fondunun direktoru olub, 2016-cı ildə Mənzil İnşaatı Dövlət Agentliyinin tərkibindəki MİDA MMC-nin direktoru təyin olunub.
Qeyd edək ki, İsrafil Təhməzlinin əmisi də dövlət qurumunda yüksək vəzifə tutur, o, Qida Təhlükəsizliyi Agentliyinin sədridir.