Ləğv edilmiş Milli Təhlükəsizlik Nazirliyi (MTN) Baş İstintaq İdarəsinin keçmiş rəisi Mövlam Şıxəliyev, idarənin keçmiş rəis müavini Sahib Ələkbərov və şöbə rəisi olmuş Vüsal Ələkbərovla birgə məhkəmə qarşına çıxarılmış Yasin Məmmədov Vəkillər Kollegiyasına üzv qəbul edilib.
Belə ki, dekabrın 28-də Yasin Məmmədova vəkil vəsiqəsi təqdim edilib.
Yasin Seyfulla oğlu Məmmədov 2008-ci ildə Milli Təhülkəsizlik Nazirliyinin (MTN) Baş İstintaq İdarəsinin İbtidai İstintaq İdarəsinin rəis müavini, 1-ci şöbənin rəisi vəzifəsinə təyinat alıb. Eldar Mahmudov Milli Təhlükəsizlik naziri olduğu dövrdə Yasin Məmmədovun adı vəzifə cinayətlərinə qarışıb. 2015-ci ilin oktyabrında MTN-də xüsusi əməliyyat keçiriləndən bir ay sonra Yasin Məmmədov MTN-dən xaric edilib.
“MTN işi” çərçivəsində Yasin Məmmədovun da cinayətləri barəsində yazılsa da, o, istintaqdan kənarda qala bilib. 2021-ci ildə Yasin Məmmədov istintaqa cəlb edilib. Ona Cinayət Məcəlləsinin 182.3.1.(hədə-qorxu ilə tələb etmə, mütəşəkkil dəstə tərəfindən törədildikdə), 182.3.2. ( külli miqdarda əmlak əldə etmək məqsədi ilə törədildikdə), – rüşvət alma (passiv rüşvətxorluq), 311.3.1. (qabaqcadan əlbir olan bir qrup şəxs və ya mütəşəkkil dəstə tərəfindən), 311.3.2. (təkrar törədildikdə), 311.3.3. (külli miqdarda törədildikdə), 311.3.4. (hədə-qorxu tətbiq olunmaqla törədildikdə), vəzifə səlahiyyətlərindən sui-istifadə və ya vəzifə səlahiyyətlərini aşma – 341.2.1. (bir qrup şəxs tərəfindən törədildikdə, 341.2.3. (ağır nəticələrə səbəb olduqda) maddələri ilə ittiham verilib.
Yasin Məmmədovun ittiham olunduğu maddələr üzrə vurduğu ziyan 10 milyon manatdan artıqdır.
Vəkillər Kollegiyası aparatının hüquqşünas məsləhətçisi Səttar Məmmədov Qaynarinfo.az-a açıqlamasında bildirib ki, Yasin Məmmədovun kollegiyaya üzv qəbul olunması qanuna zidd deyil:
“Vəkillər və vəkillik haqqında” Qanunun 8-ci maddəsinin ikinci bəndində qeyd edilib ki, ikili vətəndaşlığı, digər dövlətlər qarşısında öhdəlikləri olan, qanunla müəyyən edilmiş qaydada fəaliyyət qabiliyyəti olmayan və ya məhdud fəaliyyət qabiliyyətli hesab olunmuş, qanunvericiliklə müəyyən edilmiş qaydada alınan tibbi rəyə əsasən əqli qüsurlarına görə vəkillik fəaliyyətini həyata keçirməyə qadir olmayan, qəsdən az ağır, ağır və ya xüsusilə ağır cinayət törətməyə görə məhkumluğu ödənilməmiş və ya götürülməmiş, barəsində tibbi xarakterli məcburi tədbirlərin tətbiq edilməsi haqqında qanuni qüvvəyə minmiş məhkəmə qərarı olan şəxslər vəkil ola bilməzlər. Yasin Məmmədov barəsində məhkəmə hökmü yoxdur. Bu o deməkdir ki, onun məhkumluğu da yoxdur. Bu baxımdan, onun kollegiyaya üzv olunması qanuna zidd deyil”.