Qazaxıstanın Almatı şəhərində hərbçilər və silahlı kütlə arasında intensiv atışma başlayıb.
Bu barədə məlumatı “TASS” yayıb.
Atışma bələdiyyə binasının qarşısındakı meydanda olub. Meydana qoşun yeridilib ərazinin qarşıdurma törədənlərdən “təmizlənməsi” əməliyyatına başlanılıb.
Meydana daha öncədən onlarla silahlı şəxs gəlib. Həmin şəxslər jurnalistlərə qarşı da aqressiv mövqe nümayiş etdiriblər.
Daha sonra əraziyə 300 hərbçi cəlb olunub.
Kütləvi iğtişaşlar nəticəsində 13 polis əməkdaşı həlak olub, onlardan ikisinin başı kəsilmiş halda tapılıb. Daha 353 polis isə xəsarət alıb.
Qarşıdurma nəticəsində ümumilikdə 1000-dən çox insan xəsarət alıb. Onlardan təqribən 400-ü xəstəxanalara yerləşdirilib, 62-si reanimasiyadadır.
Xatırladaq ki, gecə saatlarında şəhərdə xüsusi antiterror əməliyyatı keçirilib.