Bu gün Milli Məclisin binası qarşısında otuza yaxın jurnalist yenidən etiraz aksiyası keçirib.
Jurnalistlər mətbuatın hüquqlarını və söz azadlığını məhdudlaşdıran “Media haqqında” qanun layihəsinə etirazlarını bildiriblər.
Aksiya iştirakçıları Milli Məclisin jurnalistlərin qanun layihəsinə dəyişiklik etmək çağırışlarına və tələblərinə məhəl qoymamasından qəzəblərini ifadə ediblər.
Aksiyada “Mürtəce qanuna yox!”, “Azad mətbuat”, “Reyetsri də götür, bas bayıra” şüarları səsləndirilib.
Polislər aksiyaya müdaxilə edərək jurnalistləri dəstələrlə əhatəyə alıblar.
Polislər aksiya iştirakçılarını ərazidən uzaqlaşdırılmağa çalışıb, plakatları onların əllərindən alıblar. Aksiya zamanı polislərlə aksiya iştirakçıları arasında qarşıdurma yaranıb.
Aksiya iştirakçıları qətnamələrini oxuyublar. Onlar deputatlardan jurnalistlərin fikrini nəzərə almağı və qanun layihəsinə lazımi dəyişiklikləri etməyi tələb ediblər. “Media haqqında” qanun layihəsinin Azərbaycan Respublikasının Konstitusiyasına və Avropa İnsan Hüquqları Konvensiyasına zidd olduğunu deyən jurnalistlər tələbləri nəzərə alınmasa, bu mürtəce qanuna məhəl qoymayacaqlarını bildiriblər.
Sonda iki aksiya iştirakçısının qətnaməni Milli Məclisin katibliyinə təqdim etməsinə icazə verilib.
Jurnalistlərin qarşısına deputatlardan çıxan olmayıb.
Şərhləri göstərməyin