Bakı Ağır Cinayətlər Məhkəməsində 15 yaşlı bacısını 4 il ərzində zorlayan qardaş Cinayət Məcəlləsinin 150.3.3-cü (Seksual xarakterli zorakılıq hərəkətləri) maddəsi ilə təqsirli bilinərək 13 il müddətinə azadlıqdan məhrum edilib.
İstintaqa əsasən, 2006-cı il təvəllüdlü qızın anası 2015-ci ildə xərçəng xəstəliyindən vəfat edib. Anası rəhmətə gedəndən sonra uşaq atası və qardaşı ilə birlikdə yaşayıb.
Cinayətin üstü yalnız məktəbli qızın hadisəni sinif yoldaşı olan qonşusuna danışandan sonra açılıb. Qonşu qız bu barədə anasına məlumat verib, anası isə olanları qızın təhsil aldığı məktəbin psixoloquna danışmağı tövsiyə edib. “Məktəblinin dostu” layihəsi çərçivəsində şagirdlərlə söhbət aparmaq üçün məktəbə gələn psixoloq olanları öyrənəndən sonra hüquq-mühafizə orqanlarına məlumat verib.
Bundan sonra qardaş və ata barəsində ayrı-ayrılıqda cinayət işi başlanıb.
Qardaş Bakı Ağır Cinayətlər Məhkəməsinin hökmündən apellyasiya şikayəti verib. Lakin apellyasiya instansiyası məhkəməsi şikayəti təmin etməyib.