Bu gün Ali Məhkəmə ləğv olunmuş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin keçmiş rəisi, general-mayor Akif Çovdarovun şikayətini qismən təmin edib və iş yenidən baxılması üçün Bakı Apellyasiya Məhkəməsinə göndərib.
Bu barədə Vətəndaş Hüquqları İnstitutunun rəhbəri, hüquq müdafiəçisi Bəşir Süleymanlı bildirib.
O qeyd edib ki, A.Çovdarov Ali Məhkəmədən barəsində olan məhkəmə hökmü ilə bağlı ona bəraət verilməsini və müsadirə olunan əmlaklarının geri qaytarılmasını istəyib.
Xatırladaq ki, A.Çovdarov keçmiş milli təhlükəsizlik naziri Eldar Mahmudov vəzifəsindən azad edildikdən sonra 2015-ci ilin noyabr ayında həbs edilib.
A.Çovdarov məhkəmənin 17 oktyabr 2017-ci il tarixli hökmü ilə 12 il müddətinə azadlıqdan məhrum edilmişdi. O, keçən il Prezident İlham Əliyevin imzaladığı əfv sərəncamı ilə azadlığa buraxılıb.
Keçmiş MTN generalının azadlıqdakı ilk fotosu geniş müzakirələrə səbəb olmuşdu.
.jpg)