Bakı Ağır Cinayətlər Məhkəməsində Azər Paşayevin sədrliyi ilə keçirilən məhkəmə iclasında ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) keçmiş icraçı direktoru Vüqar Səfərliyə hökm oxunub.
Hökmdən öncə Vüqar Səfərli son sözlə çıxış edərək məhkəmədən bəraət hökmü çıxarılmasını istəyib.
Məhkəmənin hökmü ilə Vüqar Səfərli 10 il 6 ay müddətinə azadlıqdan məhrum edilib. Hökmə əsasən, o, 3 il dövlət orqanlarında vəzifə tuta bilməz.
Məhkəmə hökmü ilə V.Səfərlinin Xətai və İsmayıllı rayonlarında yerləşən fərdi yaşayış evləri müsadirə edilib, bank hesabına isə həbs qoyulub.
İş üzrə digər təqsirləndirilən şəxslər, KİVDF-də müxtəlif vəzifələrdə çalışmış Nadir Məmmədov 6 il müddətinə azadlıqdan məhrum edilib, Bünyamin İsmayılov, Ədalət Vəliyev, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyevə isə şərti cəza alıblar.
N.Məmmədovun torpaq sahələri, Ə.Vəliyevin isə Mətbuat prospektində yerləşən çoxmərtəbəli yaşayış binası və digər daşınmaz əmlakları da müsadirə olunub.
Qeyd edək ki, V.Səfərli və digər təqsirləndirilən şəxslər 18 milyon 500 min manat məbləğində pul vəsaitini mənimsəmə və israf etmə yolu ilə talamada, rəsmi sənədlərə bilə-bilə yalan məlumatlar daxil etməklə vəzifə saxtakarlığı törətməkdə və cinayət yolu ilə əldə edilmiş 5 milyon 700 min manat pul vəsaitinin leqallaşdırılmasında təqsirli bilinirlər.
Cinayət işi üzrə Medianın İnkişafı Agentliyi zərər çəkmiş qismində tanınıb. Təqsirləndirlilən şəxslər vurduqları ziyanı ödəməlidirlər.