Ləğv edilmiş Milli Təhlükəsizlik İdarəsinin İstintaq Baş İdarəsinin keçmiş rəisi, general Mövlam Şıxəliyevin və həmin idarənin əməkdaşlarının cinayət işi üzrə məhkəmə iclası davam etdirilib.
Məhkəmə iclasında zərər çəkmiş şəxslərdən biri, kafel-metlax, tikinti materialları satışı ilə məşğul olan “Santemax” MMC-nin təsisçisi olmuş Əhməd Mirzəyev Mövlam Şıxəliyevin onu necə talayıb soyduğu barədə yeni faktlar açıqlayıb.
O, bildirib ki, M.Şıxəliyev ondan 500 min dollar alıb buraxandan sonra da ondan əl çəkməyib. Ona malikanələri və restoranları üçün pulsuz “Slavyanka” suyu daşıtdırıb, özü üçün qızıl korpuslu “Vertu” telefonu aldırıb.
Əhməd Mirzəyev M.Şıxəliyevin 2010-cu ildən 2015-ci ilə qədər onu daim nəzarət altında saxladığını bildirib:
“Hər an növbəti zərbə gələcəyini düşünmüşəm. Sözümüzü deməyə yer də tapmırdıq. Mövlam Şıxəliyev biləndən sonra ki, mənim Gədəbəydə su istehsalı ilə məşğul olan “Slavyanka” zavodunda payım var, yanına çağırdı. Tapşırdı ki, bütün villalarına, iş yerinə, restoranlarına gündəlik “Slavyanka” suyu göndərim. Mən də məcbur qalıb onun tələbini yerinə yetirdim. 2010-cu ildən düz 2015-ci ilə kimi hər gün onun villalarına, iş yerinə, restoranlarına “Slavyanka” suyu göndərmişəm. 1 qara qəpik belə verməyiblər. Heç suyu aparan maşının, fəhlənin pulunu da vermirdilər. Mən ya Mövlam Şıxəliyevin qanunsuz tələbini yerinə yetirib onun dediyini etməli idim, ya da biznesimi qoyub ölkədən çıxmalı idim. Onun tələbini yerinə yetirdim, çoxlu borcum əmələ gəldi. Məcbur olub borcun yerinə “Slavyanka”dakı payımı verdim. İndi də deyirlər ki, Mövlam Şıxəliyev heç kimdən pul almayıb. Pulumuzu da alıb, malımızı da canımızı da. Hələ utanmayıb yalan da danışırlar”.
O, Mövlam Şıxəliyevin digər zərər çəkmiş şəxs, “Kapital Bank”ın keçmiş filial müdiri Hüseyn Səfərova 2 ədəd “Vertu” telefonu aldırdığını bildiirb. O, özünün də M.Şıxəliyevə qızıldan “Vertu” telefonu aldığını deyib:
“Mövlam Şıxəliyev mənə zəng edib dedi ki, təzə “Vertu”lar çıxıb, qızıldan. Ondan al gətir. Başımı itirmişdim, nə edəcəyimi bilmirdim. Getdim maraqlandım, məlum oldu ki, onun istədiyi “Vertu”nun qiyməti 12 min dollardır. Əlacsız idim, kimə nə deyə bilərdim. Gedib aldım və MTN-ə getdim. Həmin “Vertu”nu Mövlam Şıxəliyevə kabinetində şəxsən özünə vermişəm. Vəkildən də xahiş edirəm, Mövlam Şıxəliyevdən həmin “Vertu”nu soruşsun. Biləcək ki, o, “Vertu” mənim puluma alınıb. Mən bunun üstündən keçəcəkdim. Necə ki, məhkəmədə demədim. Amma belə həyasızlıq olmaz. Pulumuzu da alıblar, başımıza müsibət açıblar, qanunsuz həbs ediblər, məhkum ediblər, indi də çıxıb deyir ki, belə şey olmayıb. Məhkəmədə də arsız-arsız deyir ki, baş verənlərdən harasa şikayət etmisən. Dövlətdən dövlətə şikayət edəcəkdim? Oturmuşdular elə vəzifədə ki, biz onlara şikayət etməli idik. Onlar quldurlara qarşı mübarizə aparmalı, millətin təhlükəsizliyinin keşiyində durmalı idilər. Amma tam əksinə idi. Millət üçün təhlükə, şər-böhtan mənbəyinə çevirilmişdilər. Açın ittiham aktını, oradakı sənəd-sübutlarla diqqətlə tanış olun. Görəcəksiniz ki, bu adamlar illərlə millətin başına nə oyun açıblar”.
O, daha sonra bildirib ki, Mövlam Şıxəliyev zəng vuraraq ondan Bakıdakı “Qaqarin körpüsü” yaxınlığında yerləşən restoranı üçün İtaliya istehsalı olan kafel-metlax göndərməyini tələb edib: Özü şəxsən zəng edib, dedi ki, restorana “italyanski” kafel-metlax apar. Mağazamızda İtaliya istehsalı olan kafel-metlax yox idi. Ona görə də başqa mağazaya 40 min manat ödəyib kafel-metlax aldım, aparıb verdim.
Onun Novxanıdakı imarəti var. Mənə tapşırmışdı ki, ora bitişik bağın həyətinə beton tökdürüm, üstündən də tamet vurdurum. Mən bu işləri də gördürmüşəm, 30 min manat pul xərcləmişəm. Bu illər ərzində Mövlam Şıxəliyevin sifarişlərinin yerinə yetirilməsinə xərclədiyim pulları vəkillərimlə birgə hesablayırıq. Bütün ziyanımı ondan tələb edəcəyəm. Mənə mənəvi baxımdan vurduğu ziyanın da qarşılığını alacağam”.
Zərər çəkmiş Əhməd Mirzəyev çıxışında baş prokuror Kamran Əliyev və DTX rəisi Əli Nağıyevdən xahiş edib ki, mətbuat üzərində müraciəti şikayət ərizəsi kimi əsas götürülərək yenidən araşdırılsın və yeni faktlar üzrə də Mövlam Şıxəliyevə ittihamlar verilsin və ona dəymiş maddi və mənəvi ziyan tam şəkildə ödənilsin.
Qeyd edək ki, Ə.Mirzəyev ötən məhkəmə iclasında bildiirb ki, keçmiş MTN əməkdaşları tərəfindən əntiq əşya qaçaqmalçılığı ittihamı ilə saxlanılıb. Saxlanılması üçün bəhanə kimi Gürcüstandan ona göndərilmiş qızıldan keçi fiquru və qranitdən hazırlanmış balta istifadə olunub. Mirzəyevə MTN-də iki variant təklif ediblər-ya 500 min dollar verib çıxır, ya girir nazirliyin zirzəmisinə. O isə məcbur olub birinci variantı seçir, şirkətinin kassasında, evində olan bütün pullarını topladır, üstəlik bankdan kredit götürür və tələb olunan məbləği yaxınları vasitəsilə MTN-ə çatdırır. Onu barəsində şərti cəza hökmü çıxarmaq üçün məhkəməyə aparırlar, orada hakim belə hökmü çıxarmaq üçün daha 100 min dollar alır. Amma azadlığa çıxandan sonra da M.Şıxəliyev Ə.Mirzəyevdən əl çəkmir. Məsələn, günlərin birində zəng edib deyir ki, ad günüdür və ona “Stefano Ricci” mağazasından kostyum almaq lazımdır. Kostyum isə 25 min dollara idi. Canından MTN xofu çıxmamış biznesmen bu məbləği də mağazaya ödəməli olur.
Şəkildə Mövlam Şıxəliyev
