Tovuzda görünməmiş oğurluq edən dəstə üzvləri saxlanılıb.
Daxili İşlər Nazirliyinin Mətbuat xidmətinin Gəncə regional qrupunun məlumatına görə, bu ilin aprel ayında rayonun Əyyublu kənd sakininə məxsus fərdi yaşayış evindən nağd pul və külli miqdarda qızıl-zinət əşyaları oğurlanıb.
Oğurluğu törətməkdə şübhəli bilinən Əyyublu kənd sakinləri Nemət Abbasov, Elşad Cəfərov, Zaur Əliyev, Asif Məmmədov, Anar Abbasov və Elvin Mirzəyev saxlanılıblar.
Araşdırmalar zamanı məlum olub ki, həmin şəxslər fərdi yaşayış evinə qanunsuz daxil olaraq oradan 2800 manat nağd pul və ümumi dəyəri 500.000 manata yaxın olan qızıl-zinət əşyalarını oğurlayıblar. Bundan sonra həmin qızıl-zinət əşyalarını əridərək külçə halına salıb, Bakı şəhərinə apararaq satıblar.
Saxlanılan şəxslərdən bir neçəsi əldə etdikləri pula avtomobil alıblar.
Həmin şəxslər maddi sübutlar ilə birlikdə saxlanılıblar.