Cənubi Afrikada aşkar olunan koronavirusun yeni “Omicron” ştamını ilk aşkarlayanlardan biri, Cənubi Afrika Həkimlər Assosiasiyasının prezidenti Angelique Coetzee əvvəlcə “Nu” adlandırılan yeni ştamın simptomları və əlamətləri ilə bağlı açıqlama verib.
Həkim “omicron” ştamının simptomlarının digərlərindən qeyri-adiliyi ilə fərqləndiyini bildirib. “Yeni ştam qeyri-adi simptomlarla fərqlənir, lakin vaksin olanlar yüngül keçirirlər. Vaksin edilməyənlərə, o cümlədən yaşlılara təsir edir”.
Coetzee bildirib ki, noyabrın 18-də həddindən artıq yorğunluq və digər simptomlarla müraciət edən 4 nəfərlik ailənin müayinəsindən sonra Cənubi Afrika Peyvənd Məsləhət Komitəsinə məlumat verib. Həmin ailənin simptomları digərlərindən fərqli və bir qədər yüngül olub.
İndiyədək test edilən 20-ə yaxın şəxsdə yeni ştam aşkarlandığını deyən mütəxəssis onların əksəriyyətinin gənc olduğunu vurğulayıb. Yoluxanların yarısı peyvənd olunmayıb. “Omicron” ştamına yoluxanların iy və dadbilmə hissi itməyib. Amma xəstələr həddindən artıq yorğun və halsızdılar.
Coetzee “omicron” ştamı aşkarlanan xəstələrdə bir və ya iki gün əzələ ağrısı, xüsusilə də hədsiz yorğunluğun qeydə alındığını da xatırladıb. Bəzilərində yüngül öskürək əlamətləri müşahidə edilir.
O da məlum olub ki, yoluxanların əvvəlcədən xroniki xəstəlikləri olmayıb. Bununla belə, həkim xəbərdarlıq edib ki, şəkər xəstələri, ürək-damar problemləri olanlar, vaksin edilməyənlər və yaşlılar yoluxarlarsa, ağırlaşmalar qeydə alına bilər.
Qeyd edək ki, yeni ştam noyabrın 11-i aşkarlansa da, həkimlər tərəfindən noyabrın 24-də təsdiqlənib.