Birləşmiş Ərəb Əmirliyindən olan general Əhməd Naser ar-Raisi İnterpol təşkilatının prezidenti seçilib.
Bu barədə məlumatı təşkilat öz tviter hesabında paylaşıb.
Əhməd Naser ar-Raisi ölkəsinin Daxili İşlər Nazirliyinin baş inspektorudur. 2018-ci ildən İnterpolun icra komitəsinin üzvüdür.
Qeyd edək ki, 2018-ci ildən bu günə qədər İnterpolun prezidenti vəzifəsini Cənubi Koreyadan Kim Çjon Yan icra edib.
Xatırladaq ki, Beynəlxalq Cinayət Polisi İdarəsi olan İnterpol (ICPO – International Criminal Police Organization) 1923-cü ildə Vyanada beynəlxalq cinayət polisi komissiyası kimi təşkil olunmuş idarədir. İnterpolun üzvü olan ölkələrdə Milli mərkəzi bürolar yaradılır. İnterpolun fəaliyəti əsasən həddi buluğa çatmamışların cinayətkarlığı, narkotik maddələrin qaçaqmalçılığı və onların qeyri-tibbi istifadəsi, pulkəsmə və qiymətli kağızların saxtalaşdırılması, daxili və xarici mülki aviasiya xətlərində banditizmlə mübarizəyə yönəldilib. Hazırda 190 ölkənin üzvlüyü var. Daimi iqəmətkahı Fransanın Lyon şəhərindədir.