Türkiyənin “Baykar Teknoloji” şirkətinin texniki direktoru Selçuk Bayraktara ağır itki üz verib.
Selçuk Bayraktarın atası, mühəndis və sənayeçi, “BAYKAR” şirkətinin İdarə Heyətinin sədri Özdemir Bayraktar 72 yaşında vəfat edib.
“Anadolu” agentliyinin yaydığı xəbərə görə, bu barədə “BAYKAR” şirkəti açıqlama yayıb: “Milli texnologiya hərəkatı ideyasının və milli pilotsuz uçuş aparatlarının yaradılmasının lideri, İdarə Heyətimizi sədri, yol göstərənimiz Özdəmir Bayraktar haqqın rəhmətinə qovuşub”, – açıqlamada bildirilir.
“BAYKAR” şirkətinin Baş direktoru Haluk Bayraktar da atasının vəfatı ilə bağlı “Twitter” hesabında paylaşım edib.
Özdemir Bayraktar bu gün Fatih məscidində təşkil olunacaq yas mərasimindən sonra İstanbulda dəfn olunacaq.
Qeyd edək ki, Özdəmir Bayraktar Türkiyə prezidenti Rəcəb Tayyib Ərdoğanın qudasıdır. Ö.Bayraktar İkinci Qarabağ müharibəsində Azərbaycanın qələbə qazanmasında mühüm rol oynayan “Bayraktar” PUA-ların yaradılmasının ideya müəllifidir. “Baykar” şirkəti tərəfindən hazırlanan “Bayraktar TB2” dronlarının Qarabağın işğaldan azad olunmasına verdikləri dəstəyə görə Prezident İlham Əliyev Özdemir Bayraktar və onun oğlanları Selçuk Bayraktarla Haluk Bayraktarı “Qarabağ” ordeni ilə təltif edib.
