Avropa İnsan Haqları Məhkəməsi (AİHM) Azərbaycanla bağlı yeni qərarını açıqlayıb.
Məhkəmə iddia edilən bütün pozuntuları tanıyıb.
Bu işdə birinci ərizəçi hüquq marifçilıiyi və insan haqlarının qorunması sahəsində ixtisaslaşan ictimai birlik olan Demokratiya və İnsan Haqları Resurs Mərkəzi idi. İkinci ərizəçi elə həmin təşkilatın qurucusu və sədri Əsabəli Mustafayevdir.
İş 2014-cü ildə maliyyə pozuntuları əsası ilə QHT-lərə açılan cinayət işinin araşdırması çərçivəsində ərizəçilərlə bağlı məhkəmə qərarlarından verilmiş şikayətlərlə bağlıdır.
Hər iki ərizəçi bank hesablarının dondurulması zamanı mülkiyyət və səmərəli müdafiə vasitələrinə malik olmaq hüquqlarına müdaxilədən şikayət edib. Ölkədən çıxışı yasaqlanan Ə.Mustafayev həm də hərəkət azadlığı hüququna müdaxilədən şikayətçi olmuşdu.
Ərizəçilər yekunda iddia edirdilər ki, onların haqlarına tətbiq edilən məhdudiyyətlə siyasi məzmunludur. Belə ki, məhdudiyyətlər Azərbaycandakı insan haqları müdafiəçilərinə və QHT fəallarına qarşı kampaniyanın tərkib hissəsi olduğundan onların fəaliyyətini iflic etməyə hesablanmışdı.
Avropa Məhkəməsi qərarında bildirdi ki, ərizəçilərə münasibətdə mülkiyyət (1 Saylı Protokolun 1-ci maddəsi), səmərəli müdafiə vasitələrinə malik olmaq (Maddə 13), hərəkət azadlığı (4 Saylı Protokolun 2-ci maddəsi) hüquqları pozulub.
AİHM həmçinin qərar verdi ki, hərəkət azadlığı və mülakiyyət hüququ ilə birgə götürülməklə, ərizəçilərin Konvensiyanın 18-ci maddəsi (Hüquqlarla bağlı məhdudiyyətlərdən istifadənin hədləri) ilə təminat verilən hüquqları da pozulub.
Qərara görə, hökumət qərar qəti olduqdan sonra mənəvi zərərə görə birinci ərizəçiyə 8 min, ikinci ərizəçiyə 15 min avro təzminat ödəməlidir. Xərc və məsrəflərə görə, 1900 avro təzminat ödənilməlidir.