Azərbaycan Futbol Federasiyaları Assosiasiyasının (AFFA) hüquqşünas Aslan İsmayılov barədə iddiası icraata götürülüb.
Məhkəmə baxışı noyabrın 10-na təyin edilib.
Aslan İsmayılov məhkəmə ilə bağlı danışaraq bildirib ki, 20 gün ərzində iddiaya etiraz vermək hüququ var və bu hüququndan istifadə edəcək. A.İsmayılov AFFA barədə yazdıqlarının məsuliyyətini dərk etdiyini bildirib:
“AFFA iddia edir ki, şəffaf fəaliyyət göstərir, hər il hesabat Konfransında futbol ictimaiyyəti, media, dövlət strukturları təmsilçilərinin, həmçinin üzvü olduğu FIFA və UEFA kimi beynəlxalq təşkilatların rəsmilərinin qarşısında hesabat verir. Həmin hesabata AFFA-nın gəlirləri və xərcləri ilə bağlı maliyyə hesabatları da daxildir. 2010-cu ildən bu ilə qədər AFFA-nın bütün hesabatları assosiasiyanın saytında yerləşdirilib və maraqlanan hər kəs həmin hesabatlarla tanış ola bilər. Özünü hüquqşünas adlandıran istənilən şəxs bu cür ittihamları səsləndirən zaman konkret hüquqi sənədlərə istinad etməli, populizm ilə məşğul olmamalıdır”.
Xatırladaq ki, Aslan İsmayılov sosial şəbəkə hesabında AFFA-nı korrupsiyada, qeyri-şəffaflıqda, işlədilən fəhlələrə əmək haqqı verilməməsində ittiham edib.
Qurumun rəhbərliyi hüquqşünasın yazdıqlarını böhatan adlandıraraq onu məhkəməyə verib.
İddiada AFFA Aslan İsmayılovun üzr istəməsini və 10 min manat təzminat ödəməsini tələb edir.