Moskvada “Çerkizov” bazarının keçmiş sahibi, azərbaycanlı milyarder Telman İsmayılovun Podqoritsada həbs edilməsi ilə bağlı yeni məlumatlar ortaya çıxıb.
Bu barədə “Kommersant” yazıb.
Məlumatda qeyd edilib ki, Telman İsmayılov təxminən üç il ərzində Monteneqronun paytaxtında kirayə götürdüyü malikanədə yaşayıb. Monteneqronun yerli hakimiyyət orqanları biznesmenin ölkədə olduğundan xəbərdar olublar. Lakin Monteneqro onun İnterpol tərəfindən axtarışda olmasına baxmayaraq, buna reaksiya verməyib:
“Biznesmen mühafizədən istifadə etmirdi, adi həyat tərzi yaşayaraq heç kimdən gizlənmirdi. Yerli rəhbərlik İsmayılovun ölkədə olduğunu bilirdi. Biznesmenin İnterpol tərəfindən axtarışda olmasına baxmayaraq, onunla bağlı suallar yaranmayıb. Bu cür sadiqlik iş adamının Monteneqro rəsmiləri ilə qurduğu şəxsi əlaqələrinə əsaslanır. Misal üçün, məlumdur ki, ölkə Prezidenti Milo Cukanoviç Telman İsmayılovun Türkiyədəki “Mardan Palace” otelində qonaq olub. Bununla əlaqədar olaraq, Monteneqro parlamentində artıq Telman İsmayılov ilə ölkə rəhbərliyi arasında əlaqəni araşdırmaq təklif olunub”.
Məlumatda o da bildirilir ki, T. İsmayılovun yaşadığı malikanə ölkə polisinin və Daxili İşlər Nazirliyinin binasının yaxınlığında yerləşir.
Telman İsmayılovun vəkili Marina Rusakova isə bildirib ki, iş adamı həbs olunmazdan bir neçə ay əvvəl Monteneqro hökumətinə siyası sığınacaq üçün müraciət edib. Vəsatətə baxılması noyabrın 12-də baş tutmalı idi.
Vəkil qeyd edib ki, T. İsmayılovun məsələsinə müğənni Avram Russonun qaçırılması ilə bağlı açılan cinayət işinin ikinci hökmü və Ali Məhkəmənin iyun ayında başqa bir iş (sahibkarlar Vladimir Savkin və Yuri Brilevin qətlə yetirilməsi) üzrə hökmü yenidən nəzərdən keçirməkdən imtina etməsi təsir edib. O, Telman İsmayılovun hər iki cinayət işində sifarişçi olaraq təqsirli bilindiyini qeyd edib. Cinayət əməllərinin T.İsmayılovun qohumları tərəfindən təşkil olunduğu bildirilir.
Qeyd edək ki, Telman İsmayılov bir neçə cinayət işində, o cümlədən iki sahibkarın qətlində ittiham olunur və 2017-ci ildə qiyabi həbs edilib. O, Rusiya hüquq-mühafizə orqanları tərəfindən beynəlxalq axtarışa verilib.