Azərbaycanlı iş adamı, “Çerkizov bazarı”nın keçmiş sahibi, AST Şirkətlər Qrupunun rəhbəri Telman İsmayılov Rusiyanın verdiyi beynəlxalq order əsasında Monteneqronun (Çernoqoriya) paytaxtı Podqoritsa şəhərində saxlanılaraq 2 ay müddətinə azadlıqdan məhrum edilib.
Ali Məhkəmənin hakimi Vladimir Novoviç T. İsmayılovun deportasiya ediləcək şəxslər üçün nəzərdə tutulan təcridxanaya yerləşdirilməsi barədə qərar qəbul edib.
Bu barədə iş adamının rusiyalı vəkili Marina Rusakova bildirib:
“Bəli, təsdiq edə bilərəm ki, o, Monteneqroda saxlanılıb və iki ay müddətinə həbs edilib. Bu qərardan artıq apellyasiya şikayəti verilib. İsmayılov siyasi sığınacaqla bağlı müraciəti yoxlanılarkən tutuldu. Bu da apellyasiya üçün əsaslardan biridir”.
Vəkil onu da deyib ki, həbs olunmasına baxmayaraq, Monteneqro T İsmayılovun apellyasiya şikayəti ilə bağlı hələ bir qərar verməyib. T. İsmayılova siyasi sığınacaq verilməsi məsələsi ölkə hakimiyyəti tərəfindən baxılmaqdadır.
Vəkilin sözlərinə görə, Monteneqro hakimiyyəti T. İsmayılova siyasi sığınacaq verməkdən imtina edərsə, onun ekstradisiyası məsələsi iki aya qədər çəkə bilər.
Qeyd edək ki, Telman İsmayılov saxlanılandan sonra Rusiyada siyasi təqiblərə məruz qaldığı üçün Monteneqrodan sığınacaq istəmişdi.
Onu da qeyd edək ki, Telman İsmayılova qarşı 2017-ci ilin noyabrında 2 nəfər moskvalı iş adamının qətlinin sifarişi ittihamı ilə cinayət işi açılıb. O, Rusiya hüquq-mühafizə orqanları tərəfindən İnterpol xətti ilə beynəlxalq axtarışa verilmişdi.
Xatırladaq ki, T. İsmayılov 2018-ci ildə Monteneqro vətəndaşlığı alıb.